Hatutan.com, (03 Abríl 2024), Díli- Adjuntu Prokuradór Jerál  Republika (PGR, sigla portugés), Pascasio de Rosa, Kuarta (03/04/2024)  simu pose hosi Prezidente Repúblika José Ramos-Horta, hodi asume responsabilidade bá Servisu contencioso Estadu no interese koletivu difusus.

Lee Mós: Prezidente Repúblika Husu Adjuntu PJR Na’in-Tolu Assegura Interese Estadu

Prezidente Repúblika José Ramos-Horta fó pose bá Adjuntu Prokuradór Jerál Repúblika (PGR, sigla portugés), Pascasio de Rosa iha Pálasiu Prezidensiál, Kuarta (03/04/2024). Foto/Elio dos Santos da Costa

Adjuntu PJR Pascasio de Rosa bá jornalista sira iha Palásiu Prezidensiál Nicolau Lobato hateten, hanesan Timoroan, hanesan majistradu ne’e hanesan onra boot ida mai nia atu asume kna’ar ida importante ida iha Ministériu Públiku servisu estadu no interese koletivu difusus.

“Nune’e ha’u komprometidu katak ho toma pose ne’e bá oin hanesan adjuntu PJR, kuazuva (ajuda) PJR iha matéria contencioso Estadu no mós iha interese koletivu difusus nian,” Pascasio de Rosa hateten.

Nia hatutan área espesífika iha Contencioso Estadu hanesan área ida ne’ebé Adjuntu PJR trata bá iha interese estadu nian no mós deviza bá iha patrimóniu no propriedade estadu nian.

“Ita hotu hatene katak iha Estadu ida ne’e hola atividade ka partisipa atividade barak iha kontratuál ninia propriedade ne’ebé presiza defende, ida-ne’e hanesan misaun bá iha MP atu asegura defeza bá iha patrimóniu no estadu nian,” Nia afirma.

Prezidente Repúblika iha kompeténsia atu nomeia Advogadu Jerál Repúblika ba tinan tolu nia laran. Entretantu iha dekretu Prezidente Repúblika nú.38/2033, de 16 de Maio hateten Prezidente Repúblika iha kompeténsia atu nomeia Prokuradór Jerál Republika bá mandatu tinan tolu.

Prezidente Repúblika dekreta, hafoin konsulta tiha ho Konsellu Superior Ministériu Públiku bazeia bá artigu 86 (l) no artigu 123 nú. 6 Konstituisaun Repúblika Demokrátika Timor-Leste, konjuga ho artigu 193 nú.4 Lei no. 7/2022 19 Maiu, ne’ebé aprova Estatutu Ministériu Públiku.

Jornalista: Vito Salvadór