Hatutan.com, (08 Abríl 2024), Díli—Prezidente Autoridade Rejiaun Administrativa Espesiál Oé-cusse Ambeno (RAEOA), Rogério Tiago Lobato relata rezultadu servisu durante fulan rua nian, hahú hosi fulan Fevereiru to’o Marsu 2024 bá Primeiru Ministru (PM), Kay Rala Xanana Gusmão.

Prezidente Autoridade Rejiaun Administrativa Espesiál Oé-cusse Ambeno (RAEOA), Rogério Tiago Lobato.

Relatóriu ne’e hato’o liu hosi enkontru formál iha Gabinete Primeiru Ministru nian iha Palasiu Governu, Segunda (08/04/2024).

Lee Mós: Governu Nomeia Ona Rogério Lobato Prezidente Autoridade RAEOA ho João Gonçalves Koordenadór Komisaun ZEESM

“Ha’u simu pose hanesan Prezidente Autoridade RAEOA nian iha loron 31 janeiru 2024, liu tiha fulan rua mak ha’u mai Díli, aprezenta relatóriu atividade durante fulan-rua nian bá Primeiru-Ministru no mós ko’alia oitoan kona-bá situasaun RAEOA nian,” Rogério Lobato hateten hafoin hasoru malu ho Primeiru Ministru.

Durante fulan-rua, Prezidente Autoridade ne’e hala’o atividade barak no prodús iha relatóriu ne’e inklui relata mós irregularidade balun ne’ebé parte Autoridade detekta iha RAEOA ligadu ho aviaun Zona Ekonomia Espesiál Sosiál Merkadu (ZEESM).

“Problema kona-bá aviaun ne’e, ema sira  hosi Canada hanesan pilotu no enjeñeiru, sira bá apaga tiha rejistu aviaun nian iha aviaun nia lolon. Ida-ne’e buat ida sira labele halo tanba aviaun ne’e patrimóniu Estadu Timor-Leste nian. Asaun ne’ebé sira halo ne’e asaun ilegál no ita bele konsidera krime tanba sira halo buat ida la loos,” Rogério Lobato haktuir.

Rogério Lobato mós esplika bá Primeiru-Ministru kona-bá despeza bo’ot ne’ebé fulan-fulan tenke selu atu ema sira hosi Canada bele kaer aviaun ne’ebé na’in mak Timor-Leste, maibé problema bo’ot ida maka Estadu Timor Leste sosa aviaun ne’e gasta millaun $7.6 no to’o agora seidauk hetan resivu.

Prezidente Autoridade Rejiaun Administrativa Espesiál Oé-cusse Ambeno (RAEOA), Rogério Tiago Lobato hasoru-malu ho Primeiru Ministru (PM), Kay Rala Xanana Gusmão iha Gabinete Primeiru Ministru nian iha Palasiu Governu, Segunda (08/04/2024).

Hanesan Autoridade másimu iha RAEOA, preokupadu tanba durante tinan-10 ne’e aviaun ne’e sé nian loos tanba Estadu Timor Leste sosa kotu ona aviaun ne’e no lo loos Timoroan mak tenke kaer resivu ne’e maibé to’o oras ne’e buka la hetan.

“Entaun, mosu irregularidade ida la loos. Ne’e duni, ha’u propoin finál kontratu. Kontratu ne’ebé sei vigora hela, loloos ramata iha 31 Agusto 2024, maibé desizaun depende ba Konsellu Ministru,” Rogério Lobato aprezenta.

Tanba ne’e, Primeiru-Ministru konvida Prezidente Autoridade RAEOA atu partisipa iha reuniaun Konsellu Ministru (KM) extraordináriu  iha Tersa (09/04/2024) hodi bele ko’alia kona-bá situasaun aviaun nian no Rogério Lobato rasik deklara katak prontu atu ko’alia asuntu ne’e perante KM.

Prezidente Autoridade atulaiza mós bá Primeiru-Ministru kona-bá investimentu balun ne’ebé investidór hosi nasaun Indonézia hakarak halo iha Oe-cusse, hanesan loke fábrika hena ne’ebé sei emprega Timoroan 5.000-resin ho totál kapitál investimentu besik millaun $20.

Alende ne’e, iha mós kompañia internasionál ida investe ona millaun $70 iha otél Sakato, hakarak asina kontratu no tau kedan osan iha Timor Leste hodi hatudu katak sira iha vontade no boa-fé.

Kona-bá assuntu irregularidade ne’ebé parte autoridade detekta iha prossesu sosa aviaun ZEESM, Prezidente Autoridade sesante, Arsénio Paixão Bano fó resposta iha ninia komentáriu privadu facebook hodi konsidera Prezidente Autoridade atuál halo drama no inventa sasan.

“Bainhira hakarak troka jestór aviaun Oe-cusse inklui pilotu sira no halo fali rejistu foun aviaun ne’e ho imi nia maluk Indonézia sira, lalikan halo drama inventa sasan, halo de’it tender hodi arruma assuntu sira ne’e tuir imi nia hakarak duke halo wow virál- iha média sira ne’e,” Hatutan.com sita deklarasaun Arsénio Bano iha ninia konta facebook privadu.

CNRT Husu MP Halo Investigasaun

Bankada CNRT iha Parlamentu Nasionál (PN) liu hosi deputada Cedeliza Faria dos Santos husu bá Ministériu Públiku atu halo investigasaun bá Aviaun ZEESM  iha RAEOA.

“Problema Aviaun ne’e akontese duni. Atuál Prezidente Autóridade mak ko’alia no ami husu atu halo investigasaun ka auditoria,” Cedeliza Faria dos Santos hateten iha PN, Segunda (08/04/2024).

Deputada ne’e husu bá autoridade kompetente sira hanesan Cámara das Contas, Ministériu Públiku no Comissão Anti Corrupção (CAC) atu haree assuntu ne’e.

“Tuir loloos ne’e problema RAEOA la’ós aviaun ZEESM iha problema barak loos, inklui Ró Haksolok, maibé bá tempu ohin ha’u hakarak fokus liu bá aviaun ZEESM haree liu hosi reseita no despeza no mós violasaun oioin akontese durante tinan-sia nia laran,” nia hateten.

Bankada CNRT louva Prezidente atuál RAEOA, Rogério Tiago Lobato ho ekipa ne’ebé detekta no kaer ona violasaun sira ne’e.

“Tuir informasaun, autoridade anteriór kada fulan selu pilotu $29.000, selu tékniku $23.000, selu ko-pilotu $3.000 inkluí despeza manutensaun no mensalmente ho total $150.000 gasta bá aviaun ZEESM,” nia hateten.

Nia hatutan, hosi orsamentu ne’ebé gasta bá pilotu no tékniku aviaun ZEESM ne’e, kada fulan hatama reseita bá kofre Estadu ho montante $6.000 kompara ho gasta kada fulan boot liu.

Iha fatin hanesan deputadu bankada FRETILIN António Calau hateten, iha paisajen dokumentu entre autoridade sesante bá komisaun tranzitóriu RAEOA nian bele husu bá komisaun ne’ebé iha Primeiru Ministru bele haree kontratu kona-bá hola aviaun no kontratu kooperasaun manutensaun bá aviaun no komprende lai kontratu ne’e molok hakilar iha públiku.

“Ami kritiká oitoan Prezidente Autóridade RAEOA agora tanba toman ona atu julga ita nia lider seluk iha públiku,” António Calau hateten.

Lee Mós: Rogério Lobato iha Programa Prioridade Hitu Durante Mandatu iha RAEOA

Jornalista: Rogério Pereira Cárceres/Zita Menezes