Hatutan.com, (11 Abríl 2024), Díli– Parlamentu Nasionál liuhosi Komisaun A ne’ebé trata asuntu Lejizlasaun no Justisa, halo ona apresiasaun bá pedidu urjénsia ne´ebé hato’o husi Governu kona-bá proposta projetu alterasaun bá lei  númeru 8/2009 kona-bá Comissão Anti Corrupção (CAC).

Lee Mós: Governu Haruka Ona Proposta Alterasaun Lei CAC bá PN

Edífisiu CAC iha Farol, Díli. Foto/Tome da Silva

Prezidente Komisaun A, Patrocínio Fernandes haktuir, inisiativa proposta bá alterasaun lei CAC  Governu haruka mai iha PN iha semana ne’e, tanba ne’e mak meza PN envia mai iha Komisaun A hodi bele halo apresiasaun.

Nia haktuir iha enkontru ne’e komisaun A aprova relatóriu paresér rua; ida relatóriu paresér bá testu espesialidade bá projetu lei direitu petisaun ida ne’ebé  trata ninia espesialidade iha Aileu. Nune’e hodi bele submete bá iha meza PN.

“Ida seluk, komisaun A simu hela inisiativa ida hosi Governu kona-bá alterasaun bá lei estatutu CAC  ninia ne’e bá iha alterasaun, tanba Governu mai ho pedidu urjénsia, tanba ne’e meza PN husu atu komisaun fó nia paresér kona-bá pedidu urjénsia ne’e. Tanba ne’e ohin ami halo apresiasaun bá pedidu urjénsia mai husi Governu,” Deputadu  Patrocínio Fernandes informa iha PN, Kinta (11/04/2024).

Hafoin Komisaun A halo apresiasaun bá  pedidu urjénsia bá proposta alterasaun lei CAC, nune’e aban loron 12 Abríl 2024, meza Parlamentu Nasionál sei konvoka reuniaun plenária estraordináriu.

“Ha’u mós simu ona informasaun katak, aban meza (PN) konvoka reuniaun plenária estraordináriu para atu delibera kona-bá pedidu urjénsia Governu ninia, entaun ami nia paresér saida, imi sei akompaña iha ne’ebá, ha’u labele lee ida-idak,” Nia informa.

Komisaun A mós seiduak ko’alia kona-bá artigu hira mak sofre bá alterasaun  lei CAC, maibé komisaun halo de’it mak apresiasaun bá pedidu urjénsia hosi Governu, nune’e aprova ona foin ka’er bá ida ne’e mak faze tuir mai meza foin baixa fali projetu lei ne’e tun bá komisaun mak foin hare bá nia andamentu seluk.

Jornalista Estajiária: Zita Menezes