Hatutan.com, (11 Abríl 2024), Díli—Polísia Nasionál Timor-Leste (PNTL) liu hosi Komandu Munisípiu Díli (KMD) fó-sai katak, iha fulan-marsu tinan ne’e, rejísta totál kríme hamutuk 190.

Komandate PNTL Munisípiu Díli, Superintendente-Xefe Orlando Gomes. Foto/Dok.Média PNTL.

Hosi númeru ne’e, kríme ofensas integridade fízika simples mak aas liu ho totál 61, tuir fali furtu agravadu 18, ikus liu maka kazu ameasa.

Lee Mós: Kazu Beto, MP Alega Krime Rua Hasoru Arguido Na’in-8, no Na’in-2 bá Ona Prizaun Preventiva

Komandante PNTL Munisípiu Díli, Superintendente Xefe Polísia Orlando Gomes informa, kazu kríme hamutuk 190 ne’e sira halo ona prosesu identifikasaun, inklui prosesu investigasaun no aprezenta ona mós bá Ministériu Públiku (MP) nu’udár na’in bá asaun penál.

“Krime sira ne’ebé mak akontese iha fulan-marsu ne’e, aas liu ne’e maka krime ofensas agresaun fízika simplés 61. Tuir fali kazu kona-bá furtu agravadu ne’e iha 18, tuir fali mai maka kazu ameasa ninian,” Komandante Orlando Gomes hateten iha kna’ar fatin, Caicoli, Kinta (11/04/2024).

Orlando Gomes dehan, kazu sira ne’ebé mak rejísta ho númeru aas liu, parte komandu hola kedan medidas atu bele halo prevensaun liuhosi atividade patrullamentu ho karreta, patrullamentu la’o ain, nomós organiza seksaun sira hotu tun iha terrenu, halo movimentu hodi halo prevensaun.

Komandante ne’e nota katak, kazu kríme sira ne’ebé mak durante ne’e mosu iha Dili, barak liu iha área Postu Administrativu Dom Aleixo, tanba iha populasaun barak, área luan, depois ema barak maka mai hosi fatin sira seluk, konsentra hotu iha Comoro.

“Tanba ne’e maka ita haree katak kríme ne’e mosu. Depois, ita haree sempre mosu konflitus ne’e, tanba baibain ne’e iha Dom Aleixo. Maibé, kazu sira ne’ebé mosu, ita prosesa hotu no aprezenta ona bá Ministériu Públiku,” nia hateten.

Komandu munisipiu Dili iha ona planu ida atu haree asuntu seguransa nian liu-liu iha área Dom Aleixo nian.

Polisia sei ativa maka’as nia atividade patrullamentu iha ne’ebá, no sei koloka postu seguransa provizóriu iha área Marconi, Suku Madohi.

“Ita tau postu provizóriu iha ne’ebá, kalan polisia sira sempre la’o tama sai fatin sira ne’ebé risku, problemátiku atu asegura fatin sira ne’e hakmatek hamutuk ho joven sira. Sira ho voluntáriu apoia seguransa ho polisia la’o iha fatin sira ne’e atu halo seguransa,” nia subliña.

Jornalista: Rogério Pereira Cárceres