Hatutan.com, (16 Abríl 2024), Díli— Câmara Comercio Indústria Timor-Leste (CCI-TL) laiha kompeténsia atu hatun folin foos ne’ebé oras ne’e kontinua sai preokupasaun povu Timor-Leste no mundu.

Foos iha armajenamentu CLN nian iha Tibar, Liquiça, ne’ebé fa’an ona ho presu $12.00 kada saka 25kg bá povu iha terítoriu nasionál. Foto/Dok

Prezidente CCI-TL, Jorge Manuel de Araújo Serrano hateten, preokupasaun komunidade nian kona-bá folin foos, ida-ne’e Governu nia kompeténsia no observasaun jerál CCI-TL nian maka Timor-Leste opta hela merkadu livre, nune’e bainhira nesesidade konsumu iha rai laran aumenta automatikamente importasaun mós sa’e.

Lee Mós: Governu Fó Subsídiu bá Importadór Sira La’ós Atu Hatun Folin Fos

“Kona-bá polítika hatun folin foos, ida-ne’e Governu mak sei ko’alia. Maibé, hanesan Prezidente CCI-TL ha’u iha informasaun no iha koñesimentu bá empreza sira ne’ebé importa fos subsídiu. Iha empreza lima, maibé tolu deside la hola parte no rua de’it mak importa fos subsidiu,” Jorge Serrano hateten hafoin sorumutu ho Prezidente Repúblika, José Ramos-Horta, iha Palásiu Prezidensiál Nicolau Lobato Bairru-Pité, tersa (16/04/2024).

Antes ne’e, Ministru Komérsiu no Indústria (MKI), Filipus Nino Pereira hateten, Governu tau millaun $4 hodi fó subsídiu bá empreza importadór foos hamutuk lima atu bele fasilita hodi hatún folin foos iha merkadu nasionál.

Jornalista: Vito Salvadór