Hatutan.com, (16 Abríl 2024), Díli—IX Governu Konstitusionál garante sei fó seguransa másimu durante loron tolu vizita Papa Francisco iha Timor-Leste (TL).

Ministru Defeza, Donanciano da Costa Gomes Pedro “Klamar Fuik”. Foto: Tome da Silva.

Ministru Defeza (MD), Contra Almirante Donaciano Costa Gomes “Pedro Klamar Fuik”  hateten, kona-bá vizita Papa Francisco nian ne’ebé ajendadu ona ba fulan Setembru, Governu liu hosi komisaun organizadora ne’ebé hola parte mós hosi Igreja Katólika servisu hamutuk ho Santa-Sé, órgaun soberania sira atu bele simu Santu Padre no mós bainaka sira.

Lee Mós: 09-11 Setembru, Papa Francisco Vizita Timor-Leste

Ministru Defeza dehan, ida-ne’e hanesan momentu ida ne’ebé importante tebe-tebes Papa Francisco bele mai depois de tinan 35 ne’ebé TL hetan vizita hosi Papa João Paulo II.

“Kona-bá preparasaun bá seguransa nian, parte Governu liu hosi Ministériu Defeza, Ministériu Interiór, no ministériu relevante sira ho órgaun sira hanesan F-FDTL, PNTL iha ona koordenasaun di’ak atu bele simu Papa Frencisco ho di’ak, simu iha ambiente ne’ebé povu hein,” Almirante Donaciano Costa Gomes “Pedro Klamar Fuik” hateten iha palásiu prezidensiál, Bairru-Pité, tersa (16/04/2024).

Antes ne’e Conferência Episcopal Timorense (CET) halo ona anúnsiu kona-bá vizita Papa Francisco nian mai Timor-Leste iha loron 09 to’o 11 fulan Setembru tinan ne’e.

Jornalista: Vito Salvadór