Hatutan.com, (28 Abríl 2024), Manatuto-Ministériu bá Administrasaun Estatál (MAE) liuhosi Sekretariadu Tékniku bá Administrasaun Eleitoral (STAE),  Sábadu (27/04/2024), organiza no realiza eleisaun  órgaun suku 2024 bá suku foun hamutuk 10 iha territóriu nasional.

Lee Mós: Eleisaun Suku Manleuana, Kandidatu Xefe Suku Jacob ho Alexandre Hakat bá Segunda Ronde

Suku Laicore, hanesan suku foun ida ne’ebé pertense iha Postu Administrativu Laclo, Munisípiu Manatuto. Foto/Wikipedia

Eleisaun suku ne’e atu fó biban demokrasia bá komunidade sira ejerse sira-nia direitu demokrátiku hodi  hili sira-nia lideransa  suku foun, tanba xefe suku tuan sira kompleta ona sira-nia mandatu iha tinan-hitu nia laran.

Iha eleisaun bá lideransa suku ne’e, Suku Laicore, Postu Administrativu Laclo, Munisípiu Manatuto, mosu kandidatu hamutuk na’in-tolu (3) mak hanesan, António “Maroan” Soares, Marcelo Gomes ho Sebastião dos Santos.

Rezultadu eleisaun iha sentru votasaun Sede Aldeia Licore, Kandidatu António Soares ho totál 75, Marcelo Gomes (15), no Sebastião dos Santos ho totál votu 10. Iha sentru votasaun Sede Aldeia Bahadik, Kandidatu António Soares ho votu 0, Marcelo Gomes (55) no Sebastião dos Santos (24).

Iha sentru votasaun Sede Aldeia Haturuin, Kandidatu António Soares ho totál votu 21, Marcelo Gomes (20), no kandidatu Sebastião dos Santos 0. Iha Sede Aldeia Reahato, Kandidatu António Soares ho totál votu 40, Marcelo Gomes (4), no Sebastião dos Santos ho totál votu 2.

Haree bá rezultadu eleisaun suku iha sentru votasaun haat ne’e, finalmente, kandidatu António Soares mak sai vensedór ka manán na’in ho votu maiória absoluta, ho totál votu 136. Kandidatu Sebastião dos Santos (Ambasa) 36, Marcelo Gomes hotu votu 94.

Dadus hosi STAE Munisipiu Manatuto, totál eleitór iha Suku Laicore 703, fahe Aldeia Bahadik 271, Aldeia Haturuin (110), Aldeia Licore (106) no Aldeia Reahatu (216). Maske nune’e, iha eleitór hamutuk 268 mak tuir vota ka tuir eleisaun ho rezultadu iha kada sentru votasaun mak hanesan, Bahadik 81, Haturuin 41, Licore 100, no Reahato 46.

Dezenvolve Suku Laicore

Lee Mós: Prezidente Repúblika Sei Harii Rasik Sentru Saúde iha Suku Laicore

Hafoin rona tiha rezultadu ofisial ne’ebé fó sai hosi órgaun eleitorál STAE iha sentru votasaun, Xefe Suku eleitu, António Soares, kompromete atu dezenvolve suku refere tanba durante tinan naruk enfrenta problema sosial oioin.

“Primeiru, hakarak hato’o ha’u nia agradesimentu uain bá komunidade hotu tanba fó ona fiar mai ha’u atu lidera suku ne’e bá tinan-hitu,” Xefe Suku Eleitu António Soares hateten bá Hatutan.com, Domingu (28/04/2024).

Programa ne’ebé António Soares tau hanesan prioridade mak hadi’a kondisaun infra-estrutura suku, administrasaun suku, baze dadus suku no haree kondisaun infra-estatura iha área  saúde, bee-moos, edukasaun, estrada, inklui problema seluk tán.

Ho rezultadu eleisaun ne’e, António “Maroan” Soares sei lidera Suku Laicore durante tinan-hitu, hosi 2024 to’o 2031, hodi substitui Xefe Suku Sesante, Zeltino Tino Cárceres do Rosário Cabral.

STAE organiza no realiza eleisaun órgaun  suku 10 iha territóriu nasional ne’e ho baze bá Lei Suku nian Númeru 09/2016, Artigu 66 kona-bá prosesu eleisaun, ne’ebé hateten katak, Xefe Suku eleitu hosi votasaun universál, lívre, diretu, sekretu no pessoal.

Lee Mós: Eleisaun Órgaun Suku iha Madohi ho Bebonuk Hakat Bá Segunda Volta

 Jornalista: Rogério Pereira Cárceres