Hatutan.com, (01 Maiu 2024), Díli—Xefe bankada PLP iha Parlamentu Nasionál (PN), deputada Maria Angelina Sarmento husu bá IX Governu Konstitusionál atu halo ulu estudu vibilidade ekonómiku molok foti desizaun hodi hasa’e saláriu mínimu bá traballadór sira iha Timor-Leste hosi $115 bá $150 nune’e labele hatodan no lori impaktu bá fundu petrolíferu iha futuru.

Deputada Maria Angelina Sarmento husu ne’e tanba tuir nia, normalmente atu hasa’e saláriu mínimu Governu tenki halo uluk estudu ekonómiku no estudu viabilidade atu hateten katak sei laiha risku bainhira hasa’e saláriu minimu bá traballadór sira.

Lee Mós: 2024, Governu Hasa’e Saláriu Mínimu Hosi $115 bá $150

“Bainhira ita hasa’e saláriu mínimu mak ita seidauk iha fonte reseita fora hosi fundu petrolíferu, entaun ha’u hanoin Governu tenki pondera lai, se la’e to’o tinan 10 mai ita nia fundu minarai esgotadu, ita sei labele tán sustenta mákina Estadu. Kada tinan saláriu mínimu aumenta sei fó todan mós bá ita nia Orsamentu Jerál Estadu,” nia hateten iha PN, Tersa (30/04/2024).

Iha parte seluk, seitór formál sira hanesan funsionáriu públiku bainhira hasa’e saláriu mínimu ne’e nia konsidera bele, maibé bainhira Timor-Leste nia fonte únika ne’ebé depedénsia ne’e mak fundu minirai de’it, dalaruma Governu tenki pondera lai.

Konabá seitór informál sira no traballadór sira iha seitór privadu, nia dehan bainhira kompañia sira ekonómikamente iha kapasidade no finanseiru atu hasa’e saláriu mínimu, sira bele propoin bá Governu atu halo Lei ida nune’e hasa’e saláriu mínimu bá traballadór seitór privadu sira hodi bele assegura katak iha enkuadramentu legál.

Iha fatin hanesan, deputadu Bankada CNRT, Natalino dos Santos hato’o parabens bá komemorasaun loron traballadór iha mundu tomak liuliu iha Timor-Leste tanba hakarak nasaun ne’e ninia dezenvolvimentu tenki iha kontribuisaun hosi traballadór sira iha seitór hotu-hotu.

“Husu Governu no SEFOPE atu haree no garantia traballadór sira nia direitu no devér. Tanba ida-ne’e tempu to’o ona atu Governu haree oinsá saláriu mínimu bá traballadór sira tanba ita haree katak nesesidade vida agora karun, taxa mós sa’e no oinsá kria kondisaun kampu traballu bá sira no bele hetan regalia ruma hosi Estadu,” Natalino dos Santos haktuir.

Nia propoin mós bá Parlamentu Nasionál atu haree oinsá halo melloramentu bá saláriu mínimu iha Timor-Leste, karik bele halo revizaun bá Lei traballadór nian atu garante sira nia direitu ka saláriu minimu.

“Atu hasa’e bá hira ne’e depende bá Governu, atu sukat bá kresimentu ekonómiku iha Timor-Leste ne’e sa’e oinsá. Maibé hakarak ka lakohi mínimu tenki hasa’e duni tanba vida ne’e karun liu no saláriu $115 ne’e ki’ik liu. Governu tenki haree hodi fó solusaun,” nia husu.

Jornalista Estajiária : Zita Menezes