Hatutan.com, (13 Maiu 2024), Díli- Prezidente Repúblika (PR), José Ramos-Horta, deklara fujitivu Arnolfo Teves Jr la elejivel atu hetan azilu polítiku iha Timor-Leste.
Lee Mós: Candice Teves Husu Estadu TL Salva Nia Kaben Fujitivu Arnolf Teves
![](https://www.hatutan.com/wp-content/uploads/2024/03/Arnolfo-Tavares-Jr.jpeg)
Fujitivu Arnolfo Teves Jr. Foto/Espesiál
Prezidente Repúblika José Ramos-Horta hato’o deklarasaun ne’e hodi hatán ba pedidu husi família, liu-liu kaben husi Fujitivu Arnolfo Teves Jr ne’ebé husu atu estadu Timor-Leste salva Arnolfo Teves Jr nia vida liu husi aprovasaun bá pedidu azilu polítiku ne’ebé fujitivu ne’e submete ona ba estadu Timor-Leste.
“Azilu polítiku buat sira ne’e ha’u hatene, Direitu Umanitáriu, Direitu Internasionál, Direitu ba azilu no refujiadu buat sira ne’e ha’u hatene. Ha’u hatene se mak elejivel no se mak la elejivel, señór ne’e (Teves Jr-red) la elejivel atu hetan azilu polítiku iha Timor-Leste. Nia iha mandatu husi INTERPOL atu entrega bá justisa iha Filipina no Timor-Leste iha obrigasaun atu kumpre mandatu detensaun mai husi INTERPOL,” Prezidente Repúblika José Ramos-Horta hateten bá jornalista sira iha Palásiu Prezidensiál, Díli, Segunda (13/05/2024).
Xefe Estadu hatutan Timor-Leste sei hetan implikasaun bainhira la halo tuir mandatu husi INTERPOL no tuir nia, Filipina nasaun Demokratiku no sira nia demokrasia hanesan ho Timor-Leste, tanba ne’e laiha razaun atu sidadaun Filipina ida mai husu azilu polítiku iha ne’e.
“Se karik Filipina iha karik pena do morte ne’e mak Timor-Leste tenke kuidadu kuandu atu deporta ema ruma ne’ebé mai iha Timor husu azilu polítiku tamba ta’uk fila bá nia rai krime ne’ebé nia komete bele hetan pena do morte, ida ne’e mak Timor-Leste tenke kuidadu, maibé iha Filipina la iha kazu ida-ne’e,” Ramos-Horta tenik.
Prosesu Kazu Teves Jr Demora
Prezidente Repúblika José Ramos-Horta, haree katak prosesu ba kazu Fujitivu Arnolfo Teves Jr nian dezde VIII Governu nia mandatu no iha momentu ne’ebá Primeiru-Ministru Taur Matan Ruak apoiu desizaun Governu nian atu haruka Fujitivu Arnolfo Teves Jr bá Filipina hodi kumpri no tuir prosesu justisa iha ne’ebá maibé prosesu ne’e la’o kleur loos.
“Prosesu bá kazu Fuzitivu Arnolfo Teves Jr ne’e demora demais tiha ona. Kuandu atu haruka kiak sira bá Becora ne’e Tribunál haruka lalais deit no kazu Fujitivu Arnolfo Teves Jr nia dada demais tiha ona no tinan hira ona, buat ruma karik,” José Ramos-Horta preokupa.
Fujitivu Arnolfo Teves Jr to’o iha Timor-Leste iha 27 fulan-Abríl 2023, liu deit loron ida depois husu kedan azilu polítiku bá Estadu Timor-Leste.
Lee Mós: PCIC Suspende no Averigua Membru Ne’ebé Deskonfia Husu Osan bá Oan Mane Fujitivu Alnolf Teves Jr
Jornalista: Vito Salvadór