Hatutan.com, (14 Maiu 2024), Díli – Eleisaun órgaun suku segunda volta iha Suku Manleuana, Postu Administrativu Dom Aleixo, Munisípiu Díli, Segunda (13/05/2024), rezulta maioria eleitór Suku Manleuana depozita konfiansa bá Jacob Tilman Soares sai hanesan xefe suku bá tinan-hitu mai (2024-2030).

Lee Mós: Eleisaun Órgaun Suku Segunda Volta, Taxa Partisipasaun iha Suku Manleu ho Madohi Menus

Xefe Suku Manleuana, Jacob Tilman Soares. Foto/Lazaro Pereira Quefi

Eleisaun órgaun suku segunda volta Jacob Tilman Soares ho númeru sorteiu 2  manan ho votu 2.209 nune’e nia adversáriu  Alexandre Soares Dias númeru ho númeru sorteiu 1 lakon ho total votu 1.730 iha faze apuramentu eleisaun órgaun Suku Manleuna.

“Agradese bá Maromak ho povu barak ne’ebé fó apoiu hodi depozita konfiansa liuhusi sira-nia votu atu ha’u lidera suku Manleuana iha tinan-hitu nia laran. Ha’u nia hakarak mak ami tenke hamutuk atu oinsá lori suku ne’e ba oin, liuliu hakarak harii solidariedade, pás ho dame iha suku Manleuana,” Xefe  suku eleitu, Jacob Tilman Soares hateten ba jornalista iha sede Suku Manleuana, Tersa (14/05/2024).

“Ha’u nia programa Xefe suku iha ona momentu ha’u tun kampaña iha povu nia leet, ha’u promete kedas iha eleisaun mak ha’u manan buat ne’ebé mak ha’u promete ha’u sei halo.”

Programa fíziku (Obra) mak hanesan;

1. Kontinua propoin bá Governu atu kontinua obra sira hanesan, PNDS ho PDIM no kontinua asegura grandee projetu sira ne’ebé Governu sentrál hala’o iha Suku Manleuana.
2. Proposta bá Governu atu konstrui fatin lixu nian iha área identifikadu.
3. Identifika drainazen iha Suku laran ne’ebé tempu udan estraga beibeik komunidade nia hela fatin.
4. Konserva ambiente liu hosi kuda ai-oan.
5. Promove industrializasaun ki’ik sira ne’ebé komunidade iha mak hanesan, homan, suku hena no halo inventarizasaun bá objetu tradisionál ne’ebé ho valor ekonómiku
6. Konstrui, halo reabilitasaun no halo jestaun ba kampu hotu iha Suku laran.
7. Identifika fatin konstrusaun sentru ba kapasitasaun no formasaun ba komunidade.

Programa non fíziku Mak hanesan;

1. Moderniza servisu administrasaun Suku nian.
2. Halo Diálogu komunitária kada fulan-6 iha nivel Aldeia sira, hodi aprezenta progresu Suku nian no rona preokupasaun sira husi komunidade.
3. Promove tara bandu tradisionál hodi hametin pás iha komunidade.
4. Sensibilizasaun bá komunidade sira hodi labele soe-fo’er arbiru.
5. Promove talentu oi-oin ne’ebé jovens sira iha, desportu, dansa tradisionál, modernu ka kontemporánea.
6. Loke kompetisaun oioin iha suku hodi komemora loron Nasional.
7. Promove produtu lokál no negósiu kiik sira.
8. Identifika sidadaun hanesan faluk, oan kiak no defisiénsia hodi halo proposta bá Governu no entidade sira seluk hodi bele hetan tulun ruma.

Suku Manleuana iha Aldeia 10 mak hanesan; Badiac, Efaca, Lemocari, Lisibutak, Lau-lora, Mauc, Mane Mesak, Manleuan, Mundu Perdido no Ramelau.

Abitante sira ne’ebé horik  iha Suku Manleuana hamutuk 7.891 nune’e partisipante iha eleisaun órgaun suku segunda volta tinan ne’e  total votante 3.939 no la partisipa hamutuk 3.952, votu nulu 33 no branku 7.

Jornalista Estajiáriu :  Lazaro Pereira Quefi