Hatutan.com, (27 Maiu 2024), Díli- Governu liu husi Ministériu Finansas (MF) ne’ebé aloka tan millaun $8 bá Ministériu Saúde (MS) kumpre rekizitu hotu ne’ebé estabelese iha Lei ezekusaun orsamentu jerál estadu (OJE).

Lee Mós: Estoke Out Ai-Moruk 31%, Governu Aloka Tan Millaun $8 bá INFPM Sosa Ai-moruk

Soru-been iha kontentor tolu ne’ebé hatama hosi Sali-Magu bá INFPM, foin lalais ne’e. Foto/Tome da Silva

Liu husi audiénsia ho  Parlamentu Nasionál, foin lalais ne’e, parte legal sira fó sira-nia opiniaun jurídiku katak alokasaun orsamentu millaun $8 bá Institutu Nasionál Farmásia no Produtu Médiku (INFPM)-Ministériu Saúde  iha nia baze legal no la iha violasaun bá regra sira aplikavel.

“Sira informa bá ami komisaun C loos duni halo duni transferénsia bá millaun $8 maibé osan ne’e iha dalan legál no ida-ne’e mak informasaun no ha’u hanoin ita labele politiza osan ida-ne’e no Governu mós tau osan bá fundu kontijénsia no ne’ebé la’ós foin premeira-vez mak halo mudansa bá fundu kontijénsia atu sosa ai-moruk, maibé ha’u haree fali istorikamente uluk mós halo hela. Ne’ebé ema legás sira dehan kumpri hela rekejitu ita lalika politiza fali,” membru Parlamentu Nasionál husi Bankada CNRT, Cedelizia Faria dos Santos  hateten iha nia intervenzaun iha plenária PN, Segunda (27/05/2024).

Biban ne’e Vise-Ministru Asuntu Parlamentár Adérito Hugo da Costa hateten tanba lakohi viola lei mak millaun $6 ne’e fila bá kofre estadu no la obriga atu ezekuta tanba lei mak hateten.

“Seidauk halo kalkulu bá  millaun $8 adisionál bá longu prazu para atu priénxe hodi di’ak kualidade no kuidadu para labele halo kompra mak depois mai expire fali, ne’ebé agora Governu sentrál akompaña hela  millaun $4,3 ne’ebé agora iha hela INFPM  sira jere hela no INFPM hateten buat ruma sobre orsamentu laiha favór haruka sira verifika  sira nian osan ho nune’e NFPM labele halo kompra tán ne’e mak kompañia privadu sira mak halo kompra,” Aderito Hugo hateten.

Iha loron 22 fulan-Maiu 2024, Diretór Ezekutivu INFPM, Brigídio de Deus hateten INFPM rasik  halo observasaun no levantamentu iha sentru saúde  sira, hanesan sentru saúde Comoro no Becora hodi identifika iha duni estoke out ai-moruk ho nune’e Governu apoiu tan orsamentu millaun $8 sosa ai-moruk hodi bele aguenta to’o tinan-ida (1) tan.

Brigidio de Deus,  konsidera katak problema estoke out ai-moruk ne’e akontese tanba planu ladiak husi Governu anteriór ho no mós menus orsamentu.

Kona-bá pasiente ne’ebe kontinua sosa ai-moruk Brigidio haktuir katak dala ruma pasiente balun tenke sosa ai-moruk tanba bainhira ai-moruk distribui mai sei liu iha prosesu oin-oin ho nune’e bainhira pasiente persija urjente tenke sosa hodi hein ai-moruk ne’ebé kompañia distribui.

Brigidio haktuir katak iha problema barak mak kontribui bá estoke out ai-moruk iha sentru saúde sira mak hanesan dadus estoke out husi kada sentru saúde la kompletu, sidauk utilija sistema M supplay ho masimu nune’e dadus  balun la rejistu nune’e difikulta ekipa atu halo distribuisaun ai-moruk tanba la hatene item ai-moruk ne’ebe estoke out.

Jornalista Estajiária : Zita Menezes