Hatutan.com, (31 Maiu 2024), Díli-Prezidente Repúblika, José Ramos-Horta ho Primeiru-Ministru Kay Rala Xanana Gusmão, konvida Sekretáriu Jerál Nasoins Unidas (ONU), António Guterres, atu  partisipa iha serimónia komemorasaun loron Konsulta Populár Timor-Leste nian ba dala-XXV  (30 Agostu 1999 – 30 Agostu 2024).

Lee Mós: Forum Ekonómiku Mundiál, Sekretáriu Jerál ONU António Guterres Kondena Makás Funu Gaza

PM Xanana kaer-liman ho SekJer ONU, António Guterres. Foto/Mídia G-PM

Konvite ho karater espesiál ne’ebé prepara hosi Xefe Estadu Ramos-Horta no povu Timor-Leste nian ne’e, entrega ofisiálmente hosi Xefe Governu Xanana Gusmão bá Sekretáriu Jerál ONU, António Guterres, bainhira partisipa abertura IV konferénsia internasionál kona-bá Estadu Illa Ki’ik Dezenvolvidu (SIDS) sira ho tema “Hamutuk Trasa Planu bá Prosperidade Reziliente,” iha São João, Antígua no Barbuda, Segunda (27/05/2024).

“Konvite ne’e espesiál tebes bá Sekretáriu Jerál ONU, António Guterres hosi povu Timor-Leste,” sita deklarasaun Primeiru-Ministru Xanana Gusmão nian iha komunikadu ne’ebé, Hatutan.com asesu, Sesta (31/05/2024).

Konvite espesiál ne’e mós sei hato’o bá bainaka importante sira seluk hanesan Xefe Estadu no Xefe Governu nasaun balun, ne’ebé sei konvida atu partisipa iha festa komemorasaun konsulta populár hosi loron 20 to’o  loron 30 fulan-Agostu 2024, hodi fó lembra kona-bá istória luta Timor-Leste nian bá independénsia.

Iha fatin hanesan, Sekretáriu Jerál ONU, António Guterres sente onradu bele hasoru Kay Rala Xanana Gusmão hanesan lider rezisténsia Timor-Leste nian ho povu Timor-Leste ne’ebé sai nu’udár belun di’ak bá líder ONU ne’e.

“Benvindu grandee amigu, Kay Rala Xanana Gusmão. Orgullu tebes bele hasoru-malu ho ita iha fatin ida ne’e. Agradese bá ita-nia prezensa iha enkontru ida-ne’e,” António Guterres hateten bainhira simu karta hosi Xanana Gusmão no kaer-liman, hako’ak-malu nu’udár belun di’ak.

António Guterres agradese ba konvite ne’e, maibé líder ONU ne’e seidauk bele fó resposta kona-bá ninia partisipasaun, tanba sei haree bá servisu ONU nian ne’ebé daudaun ne’e foka bá pás no dame iha nasaun hotu-hotu.

António Guterres durante ne’e iha relasaun di’ak ho povu no lider sira Timor-Leste nian to’o assume kargu nu’udár Sekretáriu-Jerál Organizasaun Nasoins Unidas (ONU), kontinua hakle’an kooperasaun ho  Timor-Leste, estabelese parseiru oin-oin ho nasaun membru hirak ne’ebé halo parte iha sistema globál ONU hodi ajuda hadi’a no dezenvolve Timor-Leste iha setór oioin.

António Guterres assume kargu Primeiru-Ministru Portugál hosi tinan 1995 to’o tinan 2022, no hala’o knaar hanesan Altu Komisáriu ONU nian bá Refujiadu sira hosi tinan 2005 to’o tinan 2015.

Hosi loron 1 fulan-Janeiru tinan 2017 simu knaar hanesan Sekretáriu-Jerál ONU. Eleitu hikas ho lian ida de’it hosi Estadu-Membru ONU nian hamutuk 193, bá mandatu foun iha  loron 1 fulan-Janeiru 2022 to’o agora.

Jornalista: Rogério Pereira Cárceres