Hatutan.com, (07 Juñu 2024), Díli- Ministra Justisa Portugal, Rita Alarcão Judise, konfirma katak alterasaun ba lei migrasaun iha Portugal la’ós tanba violénsia entre joven timoroan sira iha Fátima-Portugál, Domingu liubá,  maibé ne’e planu Governu nian ho objetivu atu integra, simu no halibur imigrante sira iha Portugál.

Lee Mós: Xanana “Hirus” Joven Timoroan Hafo’er Santuáriu Fátima ho Ran no Deklara Taka Totál GAM ho GAR

Ministra Justisa Portugal, Rita Alarcão Judise. Foto/Elio dos Santos da Costa

“Alterasaun lei migrasaun ne’ebé halo iha loron 03 fulan-Juñu liubá iha Portugál, laiha relasaun ho konfrontu entre joven Timoroan iha Fátima. Alterasaun ne’e preparadu antes ona, no iha programa Governu Portugál nian ne’ebé hatete hakarak iha polítika ida di’ak hodi simu sira ne’ebé imigrante ba Portugál no iha Portugál tempu hirak liubá bainhira governu foun pose, iha problema atrazu barak kona-ba atribuisaun vistu ba ema sira ne’ebé to’o iha Portugál.” Ministra Justisa Portugal, Rita Alarcão Judise klarifika hodi responde jornalista sira hafoin hasoru malu ho Prezidente Repúblika, José Ramos-Horta iha Palásiu Prezidensiál, Díli, Sesta (07/06/2024).

Nia argumenta ho alterasaun lei migrasaun nian governu iha objetivu atu integra, simu no halibur imigrante sira espesialmente ba nasaun sira CPLP, ho dokumentu sira ne’ebé prepara tiha ona husi governu, espesifikamente kona-bá reforsa vistu CPLP nian atu  fó resposta ida adekuadu no bele benefisia imigrante sira ne’ebé iha Portugál. Tanba ne’e, governu Portugál servisu maka’as hela atu oinsá imigrante sira ne’ebé tama Portugál tenke iha vistu, no Portugál sempre nakloke ba Timoroan sira.

Rejeita Fó Komentáriu kona-bá Violénsia iha Fátima

“Ha’u sei la fó komentáriu konkretu kona-ba situasaun konfrontu iha Santuáriu Fátima- Portugál, hanesan ita hotu hatene katak situasaun iha hela prosesu investigasaun Polisia Judisiál nia liman, no sei ba Tribunál hanesan mós insidente sira seluk ne’ebé akontese ba joven sira ho kualkér nasionalidade no situasaun sira ne’e sei trata husi órgaun sira kompetente,” Ministra Justisa Portugal, Rita Alarcão Judise afirma.

Nia subliña liután katak sei la ko’alia kona-ba konfrontu iha Portugál tamba prosesu hotu iha ona Polísia Judisiáriu Leiria nia kompeténsia no Tribunál sei deside ida-ne’e.

Jornalista: Vito Salvadór