Hatutan.com, (10 Juñu 2024), Díli-Komandu FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL), Segunda (10/06/2024), selebra ona akordu ida hodi armoniza regra sira kona-bá atividade operasaun no seguransa nian bá preparasaun simu vizita Sua Santidade Papa Francisco iha Timor-Leste, iha loron 09 to’o loron 11 fulan-Setembru 2024.

Lee Mós: Vatikanu Hakarak Fatin Vizita Papa Francisco Hakmatek no Seguru bá Timoroan Hotu

Komandu  F-FDTL ho PNTL halo diskusaun no armonizasaun bá seguransa vizita Papa Fancisco iha Timor-Leste. Foto/Mídia PNTL

“Ami asina orden operasaun konjunta nian bá segurasa prepara atu simu Amu Papa atu mai vizita ita-nia rai ne’e. Ami nia preparasaun mak agora to’o iha faze asina akordu operasaun no seguransa,” Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” informa bá jornalista sira hafoin serimónia asinatura akordu bá seguransa nian ho Komandante Jerál PNTL, Komisáriu Henrique da Costa, iha Kuartél Jenerál F-FDTL iga Fatuhada-Díli.

Hatán kona-bá iha vizita Papa Francisco nian ne’e komandu rua sei koloka  elementu ka forsa hamutuk hira, Falur dehan, asuntu ida defeza ho seguransa ne’e, hanesan kestaun ne’ebé ligadu ona ho alta seguransa nian. Tanba ne’e, kuantidade membru hira mak atu destaka iha terrenu ne’e la nesesáriu atu fó sai bá públiku.

Membru forsa rua ne’e iha ona mós fasilidade sira hanesan rádiu bá komunikasaun ninian. Maibé, buat ida seguransa ne’e la’ós forsa defeza ho PNTL de’it, povu tomak iha Timor-Leste ne’e mak tenke halo seguransa. Atu sé de’it, ki’ik, ka labarik, boot, responsabilidade ema hotu.

“La’ós Igreja ninian de’it, la’ós Sarani ninian de’it, la’ós instituisaun F-FDTL ho PNTL de’it. Ita hothotu ninian ne’e mak ita kontribui,” Tenente Jenerál Falur Rate Laek hateten.

Alerta Membru GAR-GAR Sira Hakmatek

Iha okaziaun ne’e, Tenente Jenerál Falur Rate Laek husu bá membru Grupu Arte-Marsiál (GAM) ho Grupu Arte-Rituál (GAR) sira atu tuur hamatek, labele kria fali violénsia durante Papa Francisco nia vizita iha TL.

“Komandu rua ne’e ninia mensajen mak ida ne’e, dehan Hakmatek!. Arte-marsiál, ne’e buat ne’e para tiha. Atu bá halo desportu nian, la’ós atu bá halo fali violénsia nian. Orientasaun iha ne’ebá, lei oinsá ona, halo tuir ida ne’e. Husu favór bá lideransa sira arte-marsiál nian boot sira para orienta sira, hanorin sira. Sira mós sarani, ka sira jentiu? Sira sarani, arte-marsiál, sira hotu kontribui para ita hotu sai susesu ida-ne’e,” Falur fó hanoin.

Komandante Falur fó hanoin katak, uluk, sivilizasaun antigu liu iha mundu mak Igreja Katólika mak lori mai to’o Timor. Igreja mak lori mai iha ne’e, sira eduka Timoroan sai matenek, avó sira sai matenek, hodi luta bá TL nia ukun-aan, no ohin loron hetan duni liberdade ida ne’e.

Iha faitn hanesan Komandante Jerál PNTL, Komisáriu Henrique da Costa, informa, ohin, sira asina ona diretiva konjunta ne’ebé mak ho baze bá iha rezolusaun Governu Númeru 22, 30 fulan-Abril 2024 atu nune’e hodi orienta membru sira hodi halo servisu.

Komandante jerál PNTL ne’e akresenta, ligadu bá preparasaun simu vizita Papa nian, servisu balu sira la’o tiha ona, liu-liu kona-bá prevensaun ninian, halo atividade formasaun ho kolega sira hosi forsa ninian, ida-idak halo ona ninia servisu, mais, intensaun ne’e bá iha prevensaun krime bá iha vizita amu Papa ninian.

“Ita akompaña iha Dili laran, ita nian polísia sira, parte Unidade Espesiál, Komandu Munisípiu Díli, Kuartél Jerál rasik apoiu, sira halo atividade movimentu, iha kalan-loron, ho intensaun atu prevee krime,” nia hateten.

Iha semana kotuk, ekipa delegasaun  hosi Vatikanu, kompostu hosi pesoál seksaun seguransa, protokolu no ofisial mídia nian hamutuk ema na’in-16 to’o iha Díli, Timor-Leste, Sábadu (01/06/2024), hodi observa  progresu konstrusaun bá Altar Misa iha área Tasi-tolu, molok simu vizita Sua Santidade Papa Francisco nian iha loron 09 to’o loron 11 fulan-Setembru tinan ne’e.

Durante estadia iha Díli, iha Domingu liubá, ekipa delegasaun ne’e mós hasoru malu ho Prezidente Repúblika, José Ramos-Horta, no iha loron tuir mai enkontru ho reprezentante Santa Sé nian iha sede Motael, inklui lider sira Igreja lokál ho komisaun Governu nian. Hafoin ida ne’e, iha tersa liubá, sira kontinua kedas hala’o inspesaun bá fatin ne’ebé Governu prepara.

Hala’o tiha inspesaun bá Altar Misa iha Tasi-tolu, ekipa delegasaun Papa Francisco nian hosi Roma-Vatikanu la ezije buat barak, maibé, buat ne’ebé sira hakarak, oinsá fatin ne’ebé Governu prepara daudauk bá vizita Papa Francisco nian ne’e  hakmatek no seguru bá Sarani Katólika sira inklui Timoroan hotu.

Jornalista: Rogério Pereira Cárceres