Hatutan.com, (10 Juñu 2024), Díli- Prezidente Repúblika (PR), José Ramos-Horta kondekora Deputy Head of Mission Embassy Austrália Suzy Wilson ho grau medalla Orden Timor-Leste nu’udár rekoñesimentu ida ba Suzy Wilson nia kontribuisaun ba Austrália no Timor-Leste nia parseria.

Lee Mós: Simeira ASEAN-Austrália Fortifika Solidariedade-Unidade bá Dezenvolvimentu Ekonómiku

Prezidente Repúblika (PR), José Ramos-Horta kondekora Deputy Head of Mission Embassy Austrália Suzy Wilson ho grau medalla Orden Timor-Leste, Segunda (10/06/2024). Foto/Mídia GPR

Ramos-Horta afirma iha momentu sira Austrália laiha Embaixadór ka Embaixadóra iha Timor-Leste, Suzy Wilson mak  ema ida ne’ebé sempre prezente iha atividade sira Estadu no Governu Timor-Leste nian.

“Ida ne’e hanesan ami fó onra ba ita,aAtu hatene katak kuandu ita la’o liu tiha, ita bele hanoin Timor-Leste bainhira ba kontinua servisu seluk iha Darwin. Ita-boot sai ona hanesan belun boot Timor-Leste nian, hanesan ema hotu ne’ebé servisu iha embaixada, nune’e mós iha Austrália ne’ebé sempre tulun ka apoiu Timor-Leste,” Prezidente Repúblika José Ramos-Horta  hateten peranti nia intervensaun iha sserimónia kondekorasaun ne’ebé hala’o iha Palásiu Prezidensiál, Díli, Segunda (10/06/2024).

Xefe Estadu subliña liután katak ohin hanesan serimónia despedida ida atu fó rekoñesimentu ba Deputy Head of Mission Embassy Austrália Suzy Wilson nia servisu sira iha Timor-Leste, ba apoiu no esforsu sira hodi benefisia Timoroan sira mesmu iha dezafiu barak.

Hodi estadu nia naran kontinua agradese ba Governu Austrália partikularmente durante pandemia COVID-19, iha ne’ebé Austrália sempre apoiu iha rekursu umanu, ai-moruk inklui vasina sira  no apoiu ba sentru sira kuarentena nian.

Deputy Head of Mission Embadora Austrália, Suzy Wilson,  orgullu tebes simu medalla ne’e husi Prezidente Repúblika, José Ramos-Horta.

“ida ne’e nu’udár rekoñesimentu ba ha’u nia kontribuisaun ne’ebé halo iha  Timor bainhira ha’u apostu iha Timor-Leste. Ha’u orgullu no  haraik an hodi simu medalla husi Prezidente Repúblika. Ha’u servisu  iha Timor-Leste  hodi apoiu  relasaun bilateral nasaun rua, Timor-Leste ho Austrália,” Suzy Wilson tenik.

Iha fulan-Jullu 2024,  Suzy Wilson  sei fila ba Darwin, tanba hetan papél foun iha Darwin. Nia hala’o ona nia knaar iha Timor-Leste dezde 2021.

Jornalista: Vito Salvadór