Hatutan.com, (10 Juñu 2024), Díli—Prezidente Repúblika, José Ramos-Horta, entrega ona nia karreta estimadu no lendáriu, mini moke bá Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah.

Lee Mós: Ramos-Horta Kondekora Liurai Brunei Darussalam Majestade H. Hassanal Bolkiah ho Medalla Grande Colar da Ordem de Timor-Leste

PR Ramos-Horta nia karreta mini moke transporta ho aviaun My Indo Airlines hodi ba entrega iha Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah. Foto/Foti husi Pajina Facebook José Ramos-Horta

Iha vizita Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah nian mai Timor-Leste, Segunda 20 fulan-Maiu 2024, Prezidente Repúblika, José Ramos-Horta ho nia karreta lendáriu mini moke ne’e bá simu Liurai Brunei Darussalam ne’e iha Aeroportu Internasionál Prezidente Nicolau Lobato, Díli.

Husi aeroportu mai sidade Díli laran, Prezidente Repúblika uza nia karreta mini moke ne’e mak transporta Liurai Brunei Darussalam ho Primeiru-Ministru (PM), Xanana Gusmão mai to’o iha Palásiu Prezidensiál hodi partisipa iha serimónia komemorasaun loron restaurasaun independénsia Timor-Leste nian bá dala-XXI (20 Maiu 2002-20 Maiu 2024).    

Informasaun ne’ebé Hatutan.com asesu husi fontes importante iha Palásiu Prezidensiál no besik Prezidente Repúblika, José Ramos-Horta, katak Liurai Brunei Darussalam,  Sua Majestade Sultan Haji Hassanal Bolkiah Mu’izzaddin Waddaulah, entuziazmu loos utiliza karreta mini moke Prezidente Repúblika José Ramos-Horta nian ne’e. Nune’e, iha dada-lia Liurai Brunei Darussalam ne’e husu tiha karreta mini moke ne’e atu bele fó ba nia.

Ho espontánea Laureadu Nobel da Pás ne’e aseita pedidu Liurai Brunei Darussalam,  Sua Majestade Sultan Haji Hassanal Bolkiah Mu’izzaddin Waddaulah hodi fó karreta mini moke ne’e.

PR Horta transporta Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah bainhira to’o iha Díli, 20 Maiu 2024. Foto/Foti husi Facebook José Ramos Horta

Iha loron 22 fulan-Maiu 2024, hale’u tuku 10:53 Otl,   Prezidente Repúblika, José Ramos-Horta delega nia ema ida (ema ne’ebé nia fiar) lori kedas dokumentu karreta mini moke nian bá entrega iha Embaixada Brunei Darussalam iha  Díli hodi trata prosesu sira transporta karreta mini moke ne’e bá  Brunei Darussalam.

Iha Segunda (10/06/2024), karreta estimadu no lendáriu Prezidente Repúblika, José Ramos-Horta nian ne’e transporta ho aviaun kargu My Indo Airlines ne’ebé aluga ka charter direta  husi Sua Majestade Sultan Haji Hassanal Bolkiah Mu’izzaddin Waddaulahhodi hodi lori liubá Brunei Darussalam. Iha karreta oin, sei tau hela baindeira RDTL ho bandeira Brunei Darussalam nian.

Prezidente Repúblika, José Ramos-Horta rasik haktuir iha nia pájina Facebook, tau mós foto ikus hamriik iha karreta  “moke” ne’ebé tula ona bá karreta tronton atu lori mai Aeroportu Internasionál Prezidente Nicolau Lobato katak  “Moke” to’o ona iha fatin distinsaun, Brunei Darussalam. “Moke” reprezenta ita-nia amizade.  Ho lian-Ingles; The old “Moke” has arrived at destination, Brunei Darussalam. The old “Moke” symbolises our friendship.

PR José Ramos-Horta liuhusi nia konta Fecabook mós hakerek ho lian-Portugés dehan nune’e, “Ofereci meu Moke, carro simples, da década de 60, ao Sultão de Brunei. Muitas pessoas ficaram tristes. Este bebé amoroso chorou.” no iha fali lian-Ingles, “I offered my old Moke to His Majesty the Sultan of Brunei Darussala. It has been my most loyal companion. Many people are sad. This adorable baby cried unconsolably.”

Jornalista: Vito Salvadór