Hatutan.com, (12 Juñu 2024), Díli— Ministériu Saúde buka hadi’a daudaun mekanizmu hotu iha prosesu distribuisaun ai-moruk husi Institutu Nasionál Farmasia no Produtu Médiku (INFPM) bá ospitál nasionál, ospitál referral, postu saúde no sentru saúde sira hotu, atu evita ai-moruk hotu ne’ebé sosa ho osan estadu tokon ba tokon dollar Amérika sunu tiha de’it tanba liu prazu ka expired.

Lee Mós: 2022-2023, Governu Sunu Ai-moruk Expired Item 275 Ne’ebé Sosa ho Kustu $124,389,319.00

Ministra Saúde, Élia A.A dos Reis Amaral. Foto/Tome da Silva

Esperiénsia hatudu ona katak iha tinan 2022 mai to’o fulan-Maiu 2023, Serviço Autónomo de Medicamentos e Equipamentos de Saúde (SAMES) ka atuál Institutu Nasionál Farmasia no Produtu Médiku (INFPM) sunu ka destroi tiha de’it produtu medikamentu item  275 ne’ebé sosa ho orsamentu Estadu ho valor $124,389,319.00 tanba de’it liu prazu ka expired.

Minista Saúde Élia  A.A dos Reis Amaral bá Hatutan.com, Kuarta (12/06/2024), iha Palásiu Governu, hateten Ministériu Saúde sei esforsu hadia irregularidade hirak ne’ebé akontese iha área saúde durante  ne’e.

“Ita servisu iha silénsiu hodi hadi’a mekanizmu hotu atu bele kontribui fó atendimentu ida di’ak liu ba povu iha área saúde  nian. Servisu nonook rezultadu mak sei halo barullu,” Ministra Élia A.A dos Reis Amaral haktuir.

Elia dos Reis Amaral rekoñese katak iha irregularidade barak akontese iha Ministeriu Saúde  ne’ebé mos kontribui ba problema stoke out ai-moruk iha rai laran.  Parte ida mós mak hanesan prova ka faktu balun mídia Hatutan.com publika ona iha edisaun, Tersa 11 fulan-Juñu 2024, kona-bá “2022-2023, Governu Sunu Ai-moruk Expired Item 275 Ne’ebé Sosa ho Kustu $124,389,319.00”.

“Ha’u senti ita-boot  jornalista sira akompaña ona faktus sira ne’ebe durante ne’e ai-moruk sunu sunu hela deit no ita-boot sira nia publikasaun sira ka notísia sira Hatutan.com nian fó servisu mai ami halo análize no hadi’a mekanizmu sira para ami hatudu progresu di’ak bá oin,” Ministra Élia A.A dos Reis Amaral  hateten. 

Élia hatutan, problema barak iha área saúde iha ona antes IX Governu hahu, hansan problema estoke out ai-moruk ne’ebé Governu sira anteriór nian husik hela tanba ne’e Governu ida lidera husi Primeiru-Ministru (PM), Kay Rala Xanana Gusmão mai atu hadi’a.

Tuir nia,  públiku inklui órgaun komunikasaun sosiál sira   akompaña hela relatoriu husi Ekipa Integradu Saúde ( EIS)  kona-bá ai-moruk  iha INFPM atinje ona 74% rezolvidu, fornesementi ai-moruk lao hela, ai-moruk tama neneik – neneik no depois sei hadia tan sasan seluk-seluk.

Jornalista: Leopoldina de Carvalho