Hatutan.com, (19 Juñu 2024), Díli—Nasaun Cuba kontinua iha kompromissu atu oferese formasaun bá timoroan sira iha área medisina, liu-liu formasaun iha área espesializada.

Lee Mós: Bolseiru 29 Dezloka Hodi Kontinua Estudu Espesializasaun Iha Cuba

Embaixadora Cuba iha Timor-Leste (TL), Grisel Alina Aldama Innis. Foto/Elio dos Santos da Costa

Embaixadora Cuba iha Timor-Leste (TL), Grisel Alina Aldama Innis hato’o kompromissu ne’e bá Prezidente Repúblika (PR), José Ramos-Horta iha Palásiu Prezidensiál Nicolau Lobato Bairr-Pité, Kuarta (19/06/2024).

Hafoin enkontru,  Grisel Alina Aldama Innis hateten, nia parte atualiza bá Xefe Estadu kona-bá kooperasaun bilaterál entre Timor-Leste ho Cuba, iha área formasaun profisionál nian, liu-liu iha estudu medisina ho nia espesializasaun nian.

Nia dehan, Timor-Leste ho Cuba iha relasaun istóriku durante tinan 20 no iha kooperasaun bilaterál ne’ebé haruka ona timoroan barak bá frekuenta kursu medisina iha Cuba no médiku espesialista sira barak hosi Cuba mai iha Timor-Leste hodi fó asisténsia saúde bá populasaun.

Alende ne’e, fó mós formasaun kontinua bá estudante medisina sira hosi Universidade Nasionál Timor Lorosa’e (UNTL) iha área medisina nian, no to’o ohin loron prodús ona rekursu umanu iha área medisina nian barak iha Timor-Leste.

“Cuba nafatin iha komitmentu atu kontinua oferese formasaun kontinua bá médiku timoroan sira ne’ebé antes ne’e hala’o ona estudu iha Cuba iha área espesializada tuir nesesidade ne’ebé Timor-Leste presiza hanesan Patolojía Pediátrika, ortopédika, neonatolojia,, Nutrisaun, Odontolojia no área espesializada seluk,” Grisel Alina Aldama Innis hateten.

Diplomata ne’e argumenta liután, Cuba nafatin iha komitmentu atu apoia dezenvolvimentu Timor-Leste iha área Saúde liu husi fornese kuidadu mediku no apoiuu mós iha seitor edukasaun, iha área Siénsia Umana, atu bele tulun hasa’e abilidade no koñesimentu Timoroan sira nian hodi dezenvolve país ne’e di’ak liután ba oin.

Iha sorumutu ne’e Prezidente Repúblika José Ramos-Horta subliña katak, Timor-Leste presiza duni atu hametin kooperasaun bilaterál ho Cuba, liu-liu iha seitór saúde no edukasaun.

Jornalista: Vito Salvadór