Hatutan.com, (21 Juñu 2024), Díli-Tribunál Supremu Justisa ka Tribunal Rekursu (TR), Sesta, 21 Juñu 2024,  hale’u tuku 20:2 Otl, hasai Mandadu Libertasaun hodi liberta fujitivu Arnolfo “Arnie” Alipit Teves Jr hosi prizaun domisiliária.

Lee Mós: TR Aplika Prizaun Domisiliária bá Fujitivu Arnolfo Teves Jr To’o Fináliza Prosesu Legál

Karta mandadu libertasuan husi TR bá fujitiivu Arnilfo Teves Jr. Foto/Repro

“Ha’u haruka atu hasai kedas extraditandu Arnolfo Alipit Teves Junior hosi prizaun, bainhira laiha prosesu seluk hasoru nian,” Hatutan.com sita  karta Mandadu Libertasaun ne’ebé hasai husi Tribunal Supremu Justisa ka Tribunál Rekursu.

Iha Mandadu Libertasaun nian hosi Tribunál Rekursu ne’e asina husi Juiza Konselleira Jacinta Correira da Costa, inklui fujitivu Arnolfo Teves Jr no mandadau ida-ne’e sai, hafoin loron sia (9) Arnolfo Teves Jr (Arguidu) kumpri Prizaun Domisiliária iha de’it ninian rezidénsia ka uma arendadu ne’ebé nia ho família iha área Metiaut.

Maske nune’e, Tribunal Rekursu bandu fujitivu ho nasionalidade Filipina ne’e atu halo viájen bá estranjeiru, nune’e mós iha fatin ne’ebé mak oras ne’e dadauk nia hela bá, labele muda, bainhira la hetan autorizasaun hosi Tribunál.

Iha mandadu libertasaun nian hosi Tribunál Rekursu ne’e mós husu atu fujitivu Arnolfo Teves Jr tenke halo aprezentasaun ninian aan bá iha Sekretária TR nian semana ida dala-rua, loron Kinta ho Segunda, ne’ebé hatuur tiha ona iha Artigu 191, Lei Kódigu Prosesu Penal (CPP-Sigla Português) Timor-Leste nian.

Kona-bá Arnolfo Teves Jr  

Red Notice husi INTERPOL bá Arnolfo Teves Jr. Foto/Repro

Iha loron 28 de Abril de 2023, Arnolfo A. Teves, Jr. ho nia família no grupu bo’ot ida ho nasionalidade Filipina halai husi  Filipina ba Estadus Unidus Amérika, liu hosi nasaun sira pasifika nian no aluga aviaun Jet Privadu transit iha Darwin mai iha Timor-Leste;

Arnolfo A. Teves, Jr. ho nia família no grupu bo’ot ne’ebé nia lori to’o iha Aeroportu Internasionál Prezidente Nicolau Lobato simu direta husi emboot balun Timor-Leste nu’udár bainaka espesiál bá na’i-ulun balun.

Arnolfo A. Teves, Jr. no nu’udár mós Deputadu ka membru Parlamentu Nasionál Filipina. Iha ne’ebé grupu ne’e halai mai Timor-Leste nia objetivo husu aziliu polítikun bá Estadu Timor- Leste;

Bainhira to’o Timor-Leste mídia Filipina fó sai katak Arnolfo A. Teves, Jr. hanesan autor intelektuál bá grupu terrorizmouiha Filipina no daudaun ne’e nia paradeiru iha Timor-Leste;

Tuir informacsaun  husi ajénsia intelijénsia Filipina nian hato’o katak Arnolfo A. Teves, Jr. hanesan autór intelektuál grupu kriminozu iha Filipina hodi oho ninia adversáriu polítiku sira. Inclui envolve iha jogu ilísitiu hodi finansia grupu terrorizmu sira iha Nasaun Filipina;

Iha loron 26 fulan-Jullu 2023 Conselho Antiterrorizmu Filipina fó sai no klasifika katak Arnolfo A. Teves, Jr. nu’udar líder ba grupu armadu ilegal no grupu terrorizmu iha Filipina no daudaun ne’e subar iha Timor-Leste;

Konsellu Antiterrorizmu Filipina fó sai no klasifika Arnolfo Teves Jr nu’udár lider bá grupu armadu ilegál. Foto/Repro

Iha Timor-Leste, liu tiha semana balu pedido azíliu polítiku hetan rejeisaun hosi Ministériu Interior, maibé individuu ne’eho apoiu hosi ninia advogadu privadu (tempu ner’ebá) Paulo Remédio, atuál Vise-Ministru Fortalesimentu Institusionál Ministériu Justisa kontinua submete rekursu bá Tribunál.

Durante hela iha Timor-Leste Arnolfo Teves, Jr. tenta hela atu sosa rai ektare iha Atabae hodi loke negósiu kasinu kompletu ho fasilidade modernu hanesan estasionamentu ba elikópteru.

Prosesu kriminal iha Filipina la’o hela hasoru Arnolfo A. Teves, Jr. no nia hanesan fujitivu, INTERPOL fó sai Red Notice, komete kazu korrupsaun, krime asasinatu no krime terrorizmu  iha Filipina;

Iha loron 21 fulan-Marsu  2024 ekipa konjunta INTERPOL no PCIC (hanesan mós INTERPOL Timor-Leste) kaptura Arnolfo A. Teves, Jr. detein iha Sela PCIC nian. Nune’e iha loron 23 fulan-Marsu 2024 tuir Decisão Tribunal Supremo da Justiça Timor- Leste nian transporta fugjtivu Arnolfo A. Teves, Jr bá kumpre Prizaun Preventiva iha Estabelecimento Prizionál Becora, Dili.

Bainhira fujitivu Arnolfo Teves Jr ho nia fen no oan-feto to’o iha aeroportu Internasionál Prezidente Nicolau Lobato, Díli iha fulan-Abríl 2023. Foto/supply

Iha loron 12 fulan-Juñu 2024, Tribunál Rekursu ka Tribunál Supremu  Justisa liuhusi despaisu aplika  medida koasaun Prizaun Domisiliária ka  “Mandado de Condução Á Prisão Domiciliaria” bá fujitivu  Arnolfo “Arnie” Alipit Teves Jr atu bele hela de’it iha nia rezidénsia ka uma to’o finaliza nia prosesu legál sira.

Desizaun hodi hasai “Mandado de Condução Á Prisão Domiciliaria” ne’e ho NUC 00224/24,TRDIL, no Númeru Prosesu 48/INQ/2024/TR, bá  Arnolfo Alipit Teves Junior, atu hela de’it iha uma.

Desizaun ne’e fó sai, hafoin Tribunál rona deklarasaun husi sasin estranjeiru hamutuk na’in-lima (5), na’in-tolu (3) Tribunál rona diretamente, na’in-rua (2) seluk liu de’it hosi telekonferensia. Sasin sira ne’e aprezenta husi parte advogadu, no prosesu audisaun ne’e Tribunal konklui tiha ona.

Jornalista: Rogério Pereira Cárceres