Hatutan.com, (26 Juñu 2024), Díli-Governu Timor-Leste liuhusi Ministériu Justisa hein deit desizaun husi Tribunál Rekursu kona-ba prosesu sira estradisaun hasoru fujitivu Arnolfo Arnie Alipit Teves Junior (Jr).

Lee Mós: Tribunal Rekursu Liberta Fujitivu Arnolfo Teves Jr

Ministru Justisa, Sérgio de Jesus Fernandes da Costa Hornai. Foto/Elio dos Santos da Costa

Ministru Justisa (MJ) Sergio Hornai dehan, desizaun ne’ebé foin lalais TR foti hodi libreta Arguidu Arnolfo Teves Jr, la’os desizaun ne’ebé mak definitiva, maibé  atu liberta de’it nia hosi detensaun provizória.

“Desizaun ne’e seidauk desizaun definitiva ida. Foin mak halo de’it bá iha ninia detensaun provizória ne’e. Agora, nia hela prizaun domisiliária, purtantu, ida ne’e mak nia halo hela, no hein desizaun Tribunál nian, kuandu autoridade sentrál informa ona, ami sei halo servisu bá ida-ne’e,” Ministru Sergio Horai, hatán bá Hatutan.com iha Palásiu Govenu, Díli, Kuarta (26/06/2024).

Bainhira iha ona desizaun definitiva tuir Artigu 35 Konstituisaun Repúblika Demokrátika Timor-Leste (K-RDTL), maka Ministériu Justisa  sempre ho prontidaun atu halo servisu bá kazu ida ne’e, atu bele efetua ninia prosesu sira.

“Sé Tribunál dehan hatete saida. Tanba ministériu públiku mak hanesan autoridade sentrál hodi asegura legalidade, buat sira ne’e. Hosi parte governu ninian, ita hein de’it desizaun Tribunál, atu hatete saida,” nia tenik.

Ministru Sergio Hornai afirma katak, Governu nia pozisaun klaru. Pozisaun Governu ninian, sira hein pronunsiamentu ikus hosi autoridade judisiáriu, no liu-liu autoridade sentrál hanesan Ministériu Públiku (MP) ne’ebé mak atu asegura legalidade.

Hatán kona-bá karik Governu nia desizaun ne’ebé atu mai ne’e, sei halo estradisaun bá argidu, ka desizaun ida oinsá, Sergio Hornai dehan depende Tribunál atu hatete saida. Kuandu estradisaun bele hotu, kuandu Tribunál deside buat ruma ona mak  Governu bele halo estradisaun.

Iha Sesta, 21 Juñu, foin lalais, haleu tuku 20:23, kalan Otl, Tribunal Rekursu hasai ona Mandadu Libertasaun nian, hodi liberta hikas fujitivu Arnolfo Alipit Teves Junior hosi prizaun domisiliária.

Mandadau ida ne’e sai, hafoin loron sia (9) Arguidu kumpri Prizaun Domisiliária iha de’it ninian rezidénsia ka uma arendadu ne’ebé nia ho família iha área Metiaut.

Maske nune’e, Tribunal Rekursu bandu fujitivu ne’e atu viájen bá estranjeiru, nune’e mós iha fatin ne’ebé mak oras ne’e dadauk nia hela bá, labele muda, bainhira la hetan autorizasaun hosi Tribunal.

Iha mandadu libertasaun nian hosi Tribunál Rekursu ne’e mós husu atu fujitivu Alnolfo Teves Junior, tenke halo aprezentasaun ninian aan bá iha Sekretária TR nian semana ida dala-rua, loron kinta ho segunda, ne’ebé hatuur tiha ona iha Artigu 191, Lei Kódigu Prosesu Penal (CPP-Sigla Português) Timor-Leste nian.

Jornalista: Rogério Pereira Cárceres