Hatutan.com, (27 Juñu 2024), Díli- Primeiru-Ministru Kay Rala Xanana Gusmão husu ba Komisáriu foun Komisaun Anti-Korrupsaun (CAC,sigla portugés), Rui Pereira,  haluhan tiha partidu hodi serbí no tau interese nasaun nian hodi hadi’a rai ne’e ba oin.

Lee Mós: Eleisaun Komisáriu CAC, Rui Pereira Pasa ho Votu Afavór 41, PLP Kontra no FRETILIN Walk Out

PM Xanana halo entrevista ho jornalista sira iha Pálasiu Prezidensiál, Díli, Kinta (27/06/2024). Foto/Mídia G-PM

“Bá Komisáriu CAC agora problema la’ós uluk iha partidu mais agora saida mak bele halo ba rai ida-ne’e. La’ós atu ba iha CAC atu rona ha’u (Primeiru-Ministru) dehan katak halo ida ne’e, halo ida ne’ebá, ho respeitu independénsia ida-ne’e mak iha tempu IV governu konstitusionál Sekretáriu Estadu ida tama iha CAC, ami protesta mais tama ami respeita no ministru tama iha ne’ebá ami protesta ida ne’e la’ós mais ami respeita. Ne’eduni ne’e la’ós kestaun, kestaun mak saida mak nia (Rui Pereira) atu halo hodi hadi’a.” Primeiru-Ministru Kay Rala Xanana Gusmão hateten ba jornalista sira iha Palásiu Prezidensiál, Kinta (27/06/2024).

Hosi sorin seluk, Sekretária Meza Parlamentár, Deputada Maria Teresa Gusmão haktuir Reuniaun Lider Bankada  deside katak iha tempu badak Parlamentu Nasionál sei realiza serimónia tomada pose bá komisáriu  foun CAC, Rui Pereira hodi nune’e komisáriu foun ne’e bele hala’o nia knaar bá períodu 2024-2028

“Ajenda ohin kona-bá ita nian  komisáriu CAC ne’ebé mak durante ne’e ita kestiona bei-beik, maibé iha loron hira liubá halo ona eleisaun. Prezidente Parlamentu Nasionál Maria Fernanda Lay sei deside data no loron ida ne’ebé mak bele atu ita bele fó posse bá ita nia komisáriu CAC Rui Pereira,” Deputada Maria Teresa Gusmão bá Jornalista sira hafoin remata reuniaun lidér Bankada iha PN, Kinta (27/06/2024).

Sekretária meza Parlamentár ne’e afirma katák seidauk iha data fixa tanba ohin fó kompeténsia bá PPN Maria Fernanda Lay atu haree data ida ne’ebé hotu-hotu bele disponivel atu bele hala’o serimónia tomada pose bá komisáriu CAC, Rui Pereira.

“Tempu badak ha’u hanoin semana ida-ne’e,  lae, semana oin, tempu badak nian laran ita sei halo serimónia tomada pose bá ita nian komisáriu CAC Rui Pereira,” Nia informa

Jornalista: Vito Salvadór/ Zita Menezes