Hatutan.com, (06 Jullu 2024), Díli-Polisia Nasional Timor-Leste (PNTL) liuhusi Komandu Polísia Eskuadra Dom Aleixo, Díli, Sesta (05/07/2024), halo sensibilizasaun kona-bá prevensaun violénsia bá estudante eskola Sekundáriu Jerál  FINANTIL, Díli.

Lee Mós: PNTL Eskuadra Dom Aleixo Mobiliza Arte Marsiál no Ritual Halo Limpeza Konjunta

Estudante Eskola Sekundáriu Jerál FINANTIL hola parte iha sensiblizasaun bá prevensaun violénsia ne’ebé organiza husi PNTL Eskuadra Dom Aleixo, Díli, Sesta (05/07/2024). Foto/Tome da Silva

Iha atividade sensibilizasaun ho maneira diálogu ne’e Komandante Polísia Eskuadra Dom Aleixo, Inspetór Xefe Polísia Alex da Costa “Samurai” husu bá estudante sira iha FINANTIL hadook aan husi aktu violénsia hotu. Nune’e, fó tempu barka liu bá estuda no eskola.

“Ita tenke iha talentu rasik, hodi fó kontribuisaun ne’ebé imi hili dadauk mai eskola ne’e, ita labele hanoin mak lorloron tuda-malu, baku-malu, asalta-malu iha dala-dalan ho farda eskola nian, farda estadu nian, ne’e signifika ita lakon ita nia tempu de’it iha tempu barak, depois halo susar bá ita-nian aman sira,” Komandante Alex Samurai hateten.

Nia enkoraza estudante sira tenke sai estudante atu bele. Domina siénsia no prepara aan bá futuru jerasaun Timor atu serbí Timor-Leste.

“Imi tenke aprende. Tanba ne’e mak husu bá ita-boot sira, apartir bá oin, ita nia situasaun tenke la’o hakmatek. Liu-liu iha parte Dom Aleixo nian, tenke la’o hakmatek, nune’e ita prepara simu iha nia  Papa Francisco ne’ebé sei halo vizita pastoral mai Timo-Leste iha loron 09 to’o loron 11 fulan-Setembru 2024,” Inspetór Xefe Polísia Alex da Costa “Samurai” hateten.

Bainhira Papa Francisco halo anúnsiu atu vizita Timor-Leste, ema nia nasaun ne’e mós preukupa ho TL nia situasaun, hakmatek ka lae. La’ós ne’e de’it, iha nasaun barak mós preukupa ho situasaun Timor-Leste nian, karik Papa Francisco nia vizita ne’e buat hothotu la’o di’ak ka lae.

Ida ne’e maka sai preukupasaun Estadu nian, Governu nian, liu-liu parte seguransa atu nafatin fó apelu bá jovens sira kria pás.

“La tempu ona katak ha’u mak da ne’ebá, ha’u mak ida ne’e. Entre ita timoroan laiha diferensia, ita mesak timoroan ida de’it,” Alex Samurai hateten.

PNTL Eskuadra Dom Aleixo, Díli, halo sensibilizasaun prevensaun vionénsia bá estudante Sekundáriu Jerál FINANTIL. Foto/Tome da Silva

Juventude rezisténsia ne’e dehan, Bandeira RDTL ne’e ida de’it, timoroan hotu iha ninia okos hotu. Tanba ida ne’e maka ema hotu tenke tane aas nafatin, labele dehan katak, nia mak maka’as liu no seluk fraku liu.

Diretór Eskola Sekundária Jerál FINANTIL, Aniceto Berelelo agradese bá komandu PNTL liuhosi eskuadra Dom Aleixo, tanba bele ho inisiativa di’ak hodi organiza ona diálogu ho estudante sira kona-bá asuntu pás no seguransa nian.

Totál manorin-na’in sira iha eskola FINANTIL iha 67, no estudante hamutuk 1,899. Diálogu ho estudante sira ne’e partisipa mós hosi autoridade komunitária Suku Comoro, inklui membru sira hosi Konsellu Polisiamentu Komunitáriu nian.

Jornalista: Rogério Pereira Cárceres