Hatutan.com, (05 Jullu 2024), Díli—Komisáriu Komisaun Anti-Korrupsaun (CAC Sigla Portugés), Rui Pereira ofisialmente simu pose hosi Parlamentu Nasionál (PPN), Maria Fernanda Lay akompaña hosi Primeiru Ministru (PM) Kay Rala Xanana Gusmão bá períudu 2024-2028.

Rui Pereira simu pose hanesan Komisáriu CAC, iha salaun konferénsia PN, sesta (05/07/2024). Foto: Elio dos Santos da Costa.

“Nu’udár komisáriu ne’ebé hetan fiar hosi Parlamentu Nasionál no Governu fó podér bá CAC atu halo investigasaun bá asuntu korrupsaun. Tanba ne’e maka kazu sira pendente, kazu sira ne’ebé hetan atensaun públiku ne’e komisáriu sei tau iha konsiderasaun no tau iha prioridade atu finaliza investigasaun,” Rui Pereira hateten bá jornalista hafoin simu pose iha salaun konferénsia PN, sesta (05/07/2024).

Lee Mós: Rui Pereira Sei Simu Pose Nu’udár Komisáriu CAC iha 5 Jullu

Nu’udár komisáriu nia parte sei haree fila-fali dokumentu sira ne’ebé mak prontu ona atu haruka bá liu iha Ministériu Públiku (MP).

Maski nune’e, nia seidauk bele pronunsia tanba tenke halo uluk servisu liuliu tenke haree kazu pendente sira ne’ebé la’ós buat foun ezemplu durante ne’e públiku preokupa ho kazu Ró Haksolok, aviaun ZEESM, fa’an rai Fulolo, Cesta Bázika ho seluk tán no preokupa ho auditoria hosi Camara de Contas.

“Ha’u seidauk bá haree kazu hira mak investiga ona iha CAC iha mandatu eis Komisáriu Sérgio da Costa Hornai,” Rui Pereira hateten.

Tuir nia, CAC sei la lori ema bá komarka maibé CAC nian podér ne’e halo investigasaun hosi investigasaun mak parseiru sira servisu hamutuk Ministériu Públiku sira mak prepara akuzasaun lori bá iha Tribunál.

“Bá oin sei la halo persegisaun politíka. Ema ne’ebé mak halo korrupsaun faktu no prová sira iha mak ita sei lori bá oin. Ita la rona ema kanta iha facebook,” nia hatutan.

CAC Sei Tau-matan bá Politiku Sira Ne’ebé Riku Derrepente

Komisáriu, Rui Pereira mós sei halo servisu ida kona-bá oinsá tau-matan bá deklarasaun rikusoin nian, liuliu kona-bá politiku na’in sira ne’ebé mak riku derrepenti.

“Servisu ida fó tán mai CAC maka halo servisu kona-bá deklarasaun rikusoin nian, ida-ne’e importante tebes tanba bele ajuda investigadór no seitór judisiál sira atu halo sira nian servisu. Sé membru Governu ka membru deputadu sira ka polítiku na’in ida ka diretór jeral balun derepente riku ne’e mai hosi ne’ebé,” Rui Pereira hateten.

CAC  nakloke bá média sira oinsá bele fó informasaun ne’ebé la’ós segredu justisa bá públiku kona-bá lala’ok kazu ruma ne’ebé mak públiku presiza hatene ninian andamentu to’o ona iha ne’ebé.

Tuir observasaun, serimónia pose ne’e Bankada FRETILIN no PLP la partisipa no partisipa de’it hosi bankada CNRT, PD no KHUNTO, Ministru Justisa no bainaka importante sira seluk.

 Jornalista Estajiária: Zita Menezes