Hatutan.com, (09 Jullu 2024), Díli—Molok atu fó lisensa operasaun bá empreza aero AirAsia husi Indonézia atu halo operasaun mai Timor-Leste presiza haree didi’ak rekizitu formal sira ne’ebé aplikavel, liuliu Air Agreement Servisu ne’ebé asina ona entre Timor-Leste ho Indonézia.

Lee Mós: Setembru, AirAsia Semo Hosi Denpasar Mai Díli

Ekipa AirAsia haosru malu ho PM Xanana iha Pálasiu Governu, Segunda (08/07/2024). Foto/Mídia GPM

Membru Parlamentu Nasionál husi Bankada FRETILIN, Nurima Robeiro Alkatiri, fó hanoin katak empreza internasionál saida de’it bele mai investe iha Timor-Leste, laiha eseptu bá empreza aero internasionál sira, maibé importante tenke kumpre rekizitu sira  iha Timor-Leste, hanesan air service agreement.

Air Service Agreement  ne’ebé Timor-Leste asina ho Indonézia fó biban atu iha balansu iha operasaun aviaun komersiál Indonézia nian mai Timor-Leste ho empreza aero Timor nian, ho nia sentidu, katak bainhira empreza aéreu Indonézia nian iha tama ona mai Timor, hanesan Citilink  bele halo balansu ho Aero Dili hanesan empreza nasionál Timoroan nian. Nune’e, la admite atu empreza aero husi Indonézia nian seluk atu mai kompete tan.

“Ha’u haree laiha razaun para ita atu impede aviaun seluk mai halo opersaun iha ita-nian rai, agora Governu mak tenke haree nia rekizitu formalidade sira, liuliu ita-nia Air Sevice Agreement ho Indonézia ne’e oinsá,”  Deputada Nurima Ribeiro Alkatiri hateten iha Parlamentu Nasionál, Tersa (09/07/2024).

“Ha’u rona  husi notísia média sira fó horisehik kona-bá AirAsia Indonézia atu halo nia opersaun husi Depansar mai Dilí. Ha’u senti importante mós ita tenki iha alternativu presu mós karik bele presu ne’ebé asesivél liubá ita-nia populasaun atu halo viajen bá mai estranjeiru,” Deputada Nurima haktuir.

Nia afirma  emprezariu nasionál sira  tenke prepara para bele halo kompete ho emprezariu internasionál iha merkadu liuliu iha  área aero nian hodi labele prezudika sira nia rendimentu.

Estadu Presiza Fó Prioridade bá Aero Dili

Hosi sorin seluk, ONG nasionál Luta Hamutuk fó opiniaun atu vizita sira Estadu Timor-Leste nian bá rai-li’ur hodi reprezenta povu Timor-Leste di’ak liu uza aviaun Timoroan nian Aero Dili ho bandeira Timor nian rasik.

“Ha’u hanoin importante maka Estadu ka Governu Timor Leste kuandu ofisial vizita sira di’ak liu uza mak aviaun Aero Dili ne’e rasik maibé ba povu baibain sira hakarak atu halo viajen ba mai ne’e konforme sira-nia kapasidade,”  Diretór ezekutivu Luta Hamutuk, José Alves da Costa hateten bá Hatutan.com iha nia edifísiu Faról, Díli.

Aviaun tenke tama barak mai Timor-Leste para nia presu ne’e kompetitivu se aprende hosi lisaun sira seluk por ezemplu iha Indonesia bainhira mai Timor-Leste sira sempre uza sira nia aviaun rasik maske presu karun mós sira tenke uza sira nia aviaun tanba ne’e Estadu Timor-Leste buka halo jestaun oinsá mak fó prioridade ba Aero Dili hanesna empreza nasional timoroan nian.

“Ita iha aviaun hanesan Aero Dili maibé tenke jere ho di’ak atu kompete ho ema seluk nune’e la bele hanoin aviaun iha ona mak la presiza tan aviaun seluk atu mai ha’u hanoin aviaun barak ne’e di’ak liu tan mas governu presiza iha jestaun di’ak atu regula,” Nia hateten.

Luta Hamutuk la fiar katak AirAsia mai atu hamate Aero Dili ne’e lae tanba ne’e sujere ba Governu atu tau prioridade ba Aero Dili, maibé atu kompete ba presu ne’e se akontese.

“Sujere ba Governu tenke kontrola didi’ak maibé bá ida liuliu ba kada vizita ofisial sira hanesan membru Governu sira atu ba rai-li’ur ka sira hosi rai-li’ur atu mai fali tenke utiliza ho orgullu ita Timoran nia aviaun Aero Díli ida ne’e mak objetivu prinsipál,”  José Alves da Costa hateten.

Jornalista Etajiária: Zita Menezes/Lazaro Pereira Quefi