Hatutan.com, (10 Jullu 2024), Díli-Konselleiru Supremu  Partidu Kmanek Haburas Unidade Nasional Timor Oan nian (KHUNTO), José dos Santos “Naimori” Bucar,  Kuarta (10/07/2024), marka prezensa iha edifísiu Prokuradoria Jerál Repúblika (PGR) hodi kumpre notifikasaun husi Ministériu Públiku (MP) atu hatán kona-bá kazu osan isin-lolon (cash) ho montante $130,000 ne’ebé atu lori sai husi Timor-Leste iha tinan 2022.

Lee Mós: Naimori Bucar ho Armanda Berta Sai Arguido bá Kazu Osan Subvensaun bá Partidu KHUNTO

Ajente Xege Polísia Gastão Piedade simu hela telefone hosi PM Taur Matan Ruak (altura ne’ebá) relativa ho asaun SNI nian prende osan partidu KHUNTO nian ho montante $130,000 atu lori sai husi Aeroportu Comoro, Díli. Foto/Dok.Repro

Iha Tersa, 04 fulan-Outubru 2022, dirijente no militante partidu KHUNTO nian balun kumpre orden verbal husi Konselleiru Supremu partidu KHUNTO, José dos Santos “Naimori” Bucar atu lori sai osan isin-lolon (cash) ho montante $130,000 husi territóriu Timor-Leste liuhosi Aeroportu Internasionál Prezidente Nicolau dos Reis Lobato.

Tanba Lei bandu, tempu ne’ebá, autoridade polisiál sira, liuliu Servisu Nasionál Intelijénsia (SNI) foti kedas medida hodi halo apreensaun bá osan ho kuantidade $130,000 ne’e nu submete hikas bá parte kompetente hodi halo investigasaun no loke prosesu legal.

“Ita hothotu hanesan sidadaun tenke koopera  lei para buat hotu bele la’o ho di’ak. Ne’ebé, tenke kumpri bá desizaun saida de’it. Ne’e relasaun ho kazu ida iha osan atu lori sai husi  aeroportu ne’e. Buat hothotu loos ona, depois Tribunál mak aban bainrua sei  julga,” José dos Santos “Naimori” Bucar, klarifika  bá Jornalista sira hafoin presta nia deklarasaun iha Ministeriu Públiku.

Naimori fundamenta katak nia prezensa iha MP ne’e hanesan dever ida ne’ebé sidadaun hotu tenke halo, tanba ema hothotu iha lei nia okos no povu Timor-Leste tenke hatene saida mak lei.

Osan ho montante $130,000 ne’e partidu KHUNTO atu lori sai bá Indonézia liuhosi Aeroportu Internasionál Prezidente Nicolau Lobato ho objetivu atu bá kompras nesesidade partidu KHUNTO nian bá kampaña eleisaun jerál 2023.

Lee Mós: MP Devolve $130.000 Ne’ebé Prende Iha Aeroportu Tanba La Prienxe Krime Brankamentu Kapitál

Jornalista: Rogério Pereira Cárceres