Hatutan.com, (17 Jullu 2024), Díli- Prezidente Repúblika (PR), José Ramos-Horta husu ba Movimentu Timor Avante (MOTIVA) atu konsolida pás no fraternidade iha sosiedade nia-leet.

Lee Mós: Mantan Menteri Untuk Dewan Menteri Fidelis Leite Magalhães Pimpin Wadah Pemikir IPIA

PR Ramos-Horta hasoru malu ho Movimentu Timor Avante (MOTIVA) ne’ebé lidera husi Fidelis  Leite  Magalhães iha Palásiu Nobre, Lahane, Díli, Kuarta (17/07/2024). Foto/Vito Salvadór

“Konsolida dame iha rai-laran para kultura dame, laiha violénsia tama duni iha Timor nia identidade kulturál. Laiha violénsia doméstika, laiha violénsia ka baku labarik sira iha uma ka eskola, iha solidariedade, fraternidade, família sira, viziñu sira buka ajuda malu, tenke buka hakle’an hahalok di’ak sira, atu sosiedade ida-ne’e sai sosiedade ida uniku no espesiál.” Prezidente Repúblika José Ramos-Horta haktuir  ba partisipante sira husi movimentu MOTIVA iha Palásiu Nobre, Lahane, Díli, Kuarta (17/07/2024).

Ramos-Horta prontu servisu hamutuk ho movimentu MOTIVA ba Timor-Leste nia prosperidade. Nia kontente ho inisiativa husi MOTIVA ne’ebé ho lideransa jerasaun foun ne’ebé organiza enkontru no reflesaun kona-bá estadu no futuru nasaun nian, ida-ne’e importante atu iha klase hotu-hotu, polítiku, ekonómiku, sosial no hotu-hotu tenke ko’alia kona-bá nasaun ne’e nia futuru.

Hanesan Xefe Estadu no lider nasionál ida,  Ramos-Horta iha preokupasaun ba Timor-Leste nia futuru iha 2027 no 2028 tenke haree ho seriemente atu kolabora maka’as ho jerasaun foun sira ne’ebé iha esperiénsia iha sistema Governasaun no ho esperiénsia servisu internasionál sira atu kontribui ba rai ne’e nia dezenvolvimentu.

“Ba ami ne’ebé ha’u nu’udár Prezidente Repúblika no maun-boot Xanana nu’udár Primeiru-Ministru, ami iha responsabilidade boot para hadi’a Estadu ne’e, hadi’a ekonomia no buat barak ne’ebé la di’ak, no buat barak ne’ebé ke di’ak tenke hakle’an para hakmaan jerasaun foun bainhira simu responsabilidade,” Ramos-Horta hateten.

Durante sesaun aprezentasaun Prezidente Repúblika José Ramos-Horta mós haktuir kona-bá oinsá esperiénsia iha servisu diplomátika, promove kooperasaun internasionál iha luta ba independénsia.

Movimentu Timor Avante (MOTIVA) nia membru sira foto hamutuk ho PR Ramos-Horta iha Palásiu Nobre, Lahane, Díli. Foto/Vito Salvadór

Ramos-Horta husu mós atu foin-sa’e sira kontínua kaer metin ba prinsípiu demokrátiku, respeita no valoriza eroi sira nia sakrifísiu no tane as lider nasional sira hodi hametin liután espíritu nasionalismu no patriotizmu iha era ukun an.

Fundadór Movimentu MOTIVA Fidelis Leite Magalhães hateten movimentu MOTIVA ne’e nu’udár movimentu boot ida ho objetivu atu halibur foin-sa’e sira, atu iha biban no oportunidade hodi fó sira nia-lian, atu hola parte iha diskusaun sira kona-ba futuru Timor-Leste nian.

Nia afirma oportunidade sira ne’ebé iha nu’udár oportunidade ba movimentu MOTIVA atu aproveita konversa ho jerasaun sira fundadór nasaun nian ne’ebé mak kontribui ona durante tinan 50 nia laran dezde 1974-1975 no kontinua iha papél serbí ba nasaun nia vida dezde 1999 too ohin loron.

“ita nia objetivu prinsipál iha MOTIVA mak ne’e, atu halo diálogu no halo treinamentu preparasaun ba foin-sa’e sira. Dalan para atu ultrapasa dezafiu sira no konkista oportunidade iha foin-sa’e sira jerasaun prezente sira ne’ebé iha hanoin di’ak no preparadu tebes iha akademiku no mos forma treinamentu sira,” Fidelis Leite Magalhães esplika.

Foin-sa’e nia Lian importante ba nasaun nia dezenvolvimentu

Koordenadór movimentu MOTIVA Fidelis Leite Magalhães. Foto/Vito Salvadór

Koordenadór movimentu MOTIVA Fidelis Leite Magalhães hateten mós katak MOTIVA nu’udár prosesu tranzisaun planeada no kontemplada, hodi hahú fó mós biban no palku ba foin-sa’e sira, atu hato’o sira nia lian no espresa sira-nia hanoin ba Timor-Leste nia futuru.

“Tamba sira (Foin-sa’e) la’ós meramente  instrumentu para rona ita-nia lian de’it, maibé sira mós tenke iha lian no atu espresa sira-nia vizaun no hanoin rasik ba Timor-Leste nia prezente no mós ba futuru,” Fidelis Leite Magalhães argumenta.

Foin-sa’e sira mak hasoru dezafiu sira realidade moris iha tempu ohin loron no hanesan nasaun oinsá fó oportunidade ba foin-sa’e sira, rona sira no tau hamutuk sira nia hanoin hotu atu bele responde ba dezafiu sira hotu ne’ebé iha.

MOTIVA nia alvu prinsipál mak Foin-sa’e sira, oinsá fó oportunidade no loke diálogu tamba Foin-sa’e mak fini ba nasaun ne’e.

Koordenadór ne’e mós agradese ba Prezidente Repúblika José Ramos-Horta ne’ebé ho prontidaun fó biban hodi ko’alia ba foin-sa’e sira iha movimentu MOTIVA no ba oin MOTIVA sei kontinua konvida lider nasional seluk hanesan Vise-Primeiru-Ministru Kay Rala Xanana Gusmão, Sekretáriu Jerál Partidu FRETELIN Mari Alkatiri, Prezidente PLP Taur Matan Ruak no lider nasional sira seluk inklui lideransa órgaun soberania sira atu ko’alia ho foin-sa’e sira iha movimentu MOTIVA.

Jornalista: Vito Salvadór