Hatutan.com, (18 Jullu 2024), Díli—Departamentu Distribuisaun iha Institutu Nasionál Farmásia no Produtu Médiku (INFPM) deskonfia pesoál saúde balun ne’ebé hala’o knar iha fasilidade saúde sira iha territóriu nasionál la onestu no buka politiza situasaun stoke ai-moruk.

Lee Mós: CAC, CFP, IJE ho DJJPE Konfirma Ai-moruk iha INFPM Sufisiente To’o 2025

Estoke Ai-moruk atuál iha armazén INFPM, Kampu Alor, Díi, Kinta (18/07/2024). Foto/Tome da Silva

INFPM rasik iha sampel ka dadus balu iha sentru saúde balu iha territóriu nasionál, hatudu pesoál saúde balu kontinua husu pasiente bá sosa ai-moruk iha klínika privadu sira, inklui partilla informasaun bá pasiente ho nia família sira katak ai-moruk laiha.  

Kazu ne’e mós akontese iha postu saúde Hera ne’ebé viral iha média sosiál Facebook, katak iha pasiente sira simu de’it ai-moruk xarope paracetamol iha plástiku hodi fó prova katak ai-moruk mak laiha. Mas realidade ne’ebé Diretór Distribuisaun INFPM, Krizanto Monteiro bá rasik haree ho matan no konfirma direita iha Postu Saúde Hera katak ai-moruk xarope paracetamol iha hela.

“Ha’u bá haree ho matan iha Sentru Saúde Hera, ai-moruk iha, ha’u mós la komprende maibé ita labele halimar ai-moruk, ita sidauk hemu ai-moruk tanba sidauk moras, ita sidauk toba iha ospitál tanba sidauk moras, se ita moras mak ita sei hemu, ita kuidadu keta politiza buat ne’e, ai-moruk iha, mas ita balu dehan laiha,” Diretór Distribuisaun INFPM, Krizanto Monteiro haktuir bà  jornalista sira iha edifísiu  INFPM, Kinta (18/08/2024).

Nia afirma katak problema stoke out ai-moruk ne’ebé akontese la’ós tanba ai-moruk laiha, maibe tanba iha pesoal balu mak hakarak kria situasaun ladiak.

“Tuir filosofia ida dehan katak Farmasista ida kuandu inklina an iha politika, loron-loron nia informa ai-moruk laiha hela deit, maske ai-moruk iha, doutor ida mak inklina ka mete politika partidu, loron-loron numeru pasiente mate hela deit, maske mate iha mas la’ós ho númeru espekulativu ne’e. Ita sakrifika ita-nia profisionalizmu ba interese polítiku hodi hatuun malu no tanba de’it la gosta malu ka diferente polítika,” Krizanto Monteiro hateten

Estoke ai-moruk iha armazén INFPM. Foto/Tome da Silva

Krizanto deklara katak ai-moruk paracetamol iha plastiku ne’e la’ós fó ba ema ho idade boot (adultu) maibe fó ba bebe sira ne’ebe simu vasina, nune’e bele hamenus moras, maibe ai-moruk iha hela.

Nia dehan tan katak nia parte la  koalia ema se mak sala, maibé  ida-ne’e mak realidade, ema hotu tenke analiza deit tanbasá mak problema ne’ e nune’e, ai-moruk iha dehan laiha, stock out ne’e normal mundialmente stock out aimoruk 30% ne’e kategoria normal.

Nia hateten, ai-moruk xarope paracetamol tau iha plastiku  bebe sira persija xarope ne’ebe ho kuantidade 3cc,  tanba kuantidade xarope kada botir 60cc ho nune’e  mak farmasista sira deside hodi fahe husi Paracetamol iha botir ida 60cc, fó deit 3cc ba bebe no maneira jestaun hanesan ne’e halo ona desde tinan 2001 ho objetivu atu labele estraga xarope.

Estoke out ai-moruk iha postu saúde Hera 3%

Estoke ai-moruk iha INFPM. Foto/Tome da Silva

Postu Saúde Hera  estoke out ai-moruk 3%, maibe tuir informasaun ne’ebe relata katak 3% la signifika katak ai-moruk laiha ona, maibé kuantidade menus ona, tanba ne’e ekipa sira konsidera ne’e stock out nune’e bele halo pedidu lalais antes aimoruk hotu.

Distribuisaun ai-moruk husi INFPM ba iha sentru saúde bazeia ba planu ne’ebé iha mak kada fulan sempre halo distribuisaun reguler, no prontu apoiu emerjensia.

Jornalista : Leopoldina de Carvalho