Hatutan.com, (24 Jullu 2024), Dilí—Parlamentu Nasionál (PN) preokupa no husu Governu atu tau atensaun bá kontentór balun ne’ebé mak hatama sigaru la tuir dalan legál no oras ne’e nakonu iha Timor-Leste (TL).

Autoridade Timor-Leste halo verifikasuan hikas bá kuantidade sigaru ilísitiu ne’ebé importa husi Kambodia, Segunda (22/07/2024). Foto/Rogério Pereira Cárceres

Xefe Bankada CNRT, deputadu Duarte Nunes levanta kestaun ne’e iha intervensaun plenária, kuarta (24/07/2024).

Lee Mós: Autoridade Timor-Leste Prende Sigaru Manchester Kaixa 1013 Husi Kambodia

Reprezentante povu ne’e rona informasaun iha média katak, kontentór balun mai hosi nasaun viziñu tula sigaru depois parte servisu Alfándega haruka fila tiha kontentór ne’e tanba laiha autorizasaun hosi Ministériu Saúde (MS) maibé derrepenti kontentór fila-fali mai hatama tiha sigaru iha Portu Tibar.

“Dalaruma iha mafia boot ida iha Alfándega. Ne’e ita presiza atensaun no fó hanoin bá Governu tanba agora iha tempu badak atu troka Komisáriu Alfándega, nune’e favór ida haree figura ida di’ak mak bele troka,” deputadu Duarte Nunes  hateten.

Nia husu bá Governu atu fihir ema di’ak ne’e ho figura kredivel atu bele halo jestaun diak bá reseita Estadu, la’ós hatama fali reseita bá bolus.

Parte téknika hosi Vise-Ministru Asuntu Parlamentár, Adérito Hugo da Costa sei envia asuntu ne’e bá Ministériu relevante sira atu atensaun.

Jornalista estájiaria: Zita Menezes