Hatutan.com, (25 Jullu 2024), Díli- Iha reuniaun semanál, Prezidente Repúblika (PR), José Ramos-Horta ho Primeiru-Ministru (PM), Kay Rala Xanana Gusmão, Kinta (25/07/2024) iha Palásiu Prezidensiál,  ko’alia kle’an ba asuntu seguransa nu’udár  preparativu ba eventu sira loron konsulta Populár, 30 Agostu  no vizita ofisiál Papa Francisco nian mai Timor-Leste iha loron 09 to’o loron 11 fulan-Setembru 2024.

Ramos-Horta ho Xanana halo enkontru semanál, Kinta (25/07/2024), iha Pálasiu OPrezidensiál. Foto/Elio dos Santos da Costa

Iha loron 13 fulan-Agostu premiadu Nobel na’in haat to’o iha Timor-Leste no iha mós eventu 20  Agostu, loron FALINTIL no iha loron 28 Agostu Sekretáriu Jerál ONU António Guterres mai Timor-Leste, no partisipasaun Sekretáriu Jerál ONU ne’e hanesan vizita ida importante tebetebes no iha fulan-Setembru Papa Francisco nia vizita ofisiál mós mai Timor-Leste konforme program sira ne’ebé feitu ona.

“Bá ita nia seguransa sira ne’e servisu todan, tenke servisu didi’ak, la’ós de’it tamba iha ameasa ruma, maibé para kontrola populasaun, no organiza didi’ak tamba dalaruma kuandu iha eventu boot ne’e ema hotu-hotu hakarak halai, dudu-malu depois akontese insidente ruma  ita hotu la espera,” Prezidente Repúblika José Ramos-Horta hateten bá jornalista sira.

Primeiru-Ministru Kay Rala Xanana Gusmão husu ba joven sira atu valoriza sakrifísiu husi inan-ama no ferik-katuas sira ne’ebé halo ona bá rai ne’e hetan independénsia.

“Ba joven sira favór ida labele permite violénsia iha ita nia rain,” Primeiru-Ministru Kay Rala Xanana Gusmão hateten.

Xefe Governu subliña liután hodi husu atu joven sira hakuak-malu, respeita-malu, labele permite violénsia.

Loron 09 fulan-Agostu Sei Konvoka Reniaun KSDS

Prezidente Repúblika José Ramos-Horta afirma liután katak molok tama ba eventu no serimónia resepsaun ba ukun no Xefe Estadu sira no lider mundiál sira nia vizita mai Timor-Leste, sei konvoka reuniaun Konsellu Superior Defeza no Seguransa (KSDS) hodi halo análize ba situasaun segura iha territóriu nasionál no mós rejionál no mundiál.

“Tamba ne’e ko’alia ona ho Primeiru-Ministru para iha loron 09 fulan-Agostu sei iha reuniaun Konsellu Superior Defeza no Seguransa para haree de’it situasaun no análize preparativus sira seguransa nian ba vizita sira ne’ebé sei mai ne’e,” José Ramos-Horta haktuir.

Jornalista: Vito Salvadór