Hatutan.com, (30 Agostu 2024), Dili- Malázia iha kompromisu forte atu fó apoiu másimu ba dezenvolvimentu setór turizmu hodi hasae kreximentu ekonómiku sustentável iha Timor-Leste.

Lee Mós: 2025 Malázia Lidera Prezidénsia ASEAN, Sei Fó Apoiu Totál bá Adezaun TL

Vise-Primeiru Ministru no Ministru Dezenvolvimentu Rural no Rejional Malázia, Ahmad Zahid Hamidi, hasoru malu ho Vise-Primeiru Ministru Francisco Kalbuadi Lay, iha Farol, Díli, Kuarta(29/08/2024). Fot/Elio dos Santos da Costa.

Deklarasaun ne’e Vise-Primeiru-Ministru no Ministru Rejionál no Rural Malázia, Dato Ahmad Zahit Hamidi hato’o hafoin hasoru malu ho Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay iha Díli, Kinta (29/08/2024).

Koordenadór Jerál MECAE, Jorge Rui de Carvalho Martins hateten iha sorumutuk bilaterál entre Vise-Primeiru-Ministru na’in rua ne’e, Vise-Primeiru-Ministru no Ministru Rejionál no Rural Malázia, Dato Ahmad Zahit Hamidi toka liu ba apresiasaun no koordenasaun servisu entre Timor-Leste no Malázia iha servisu bilaterál ne’ebé hakle’an liu ba iha área dezenvolvimentu ekonómiku, turizmu no iha area seluk ne’ebé importante tebes atu Timor-Leste no Malázia esplora liu-liu iha konetividade Aero no dezenvolvimentu Turizmu.

Vizita Vise-Primeiru-Ministru no Ministru Rejionál no Rural Malázia, Dato Ahmad Zahit Hamidi iha Timor-Leste ne’e hakarak atu haree de’it potensialidade saida maka Malázia bele kontribui ba Timor-Leste nia dezenvolvimentu ekonómiku no turizmu liu-liu iha dezenvolvimentu rural.

“Malázia iha kompromisu forte atu apoiu Timor-Leste iha asisténsia tékniku no mós kapasitasaun rekursu umanu (Capasity Building), tamba iha área turizmu Malázia iha esperiénsia lubuk ida ne’ebé bele fahe ho Timor-Leste,” Jorge Rui de Carvalho Martins haktuir ba jornalista sira hafoin akompaña sorumutuk ne’e.

Malázia mos iha kompromisu atu apoiu Timor-Leste liu husi ASEAN Tourism Forum oinsá atu halo promosaun intensivu ba potensialidade turístiku iha Timor-Leste atu bele sai hanesan sentru dezenvolvimentu ekonómiku rurál iha Timor-Leste.

Apoiu Másimu Timor-Leste nia adezaun ba ASEAN iha 2025

Malázia nafatin hatudu nia kompromisu no prontidaun atu apoiu Timor-Leste nia adezaun total ba organizasaun rejionál Association of Southeast Asian Nation (ASEAN). iha 2025.

“Malázia nafatin iha kompromisu no pozisaun ida klaru atu apoiu Timor-Leste nia adezaun ba organizasaun rejionál ASEAN iha 2025,” hateten Jorge Rui de Carvalho Martins.

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay aprezenta mos ba Vise-Primeiru-Ministru no Ministru Rejionál no Rural Malázia, Dato Ahmad Zahit Hamidi kona-ba investimentu real ne’ebé investidór Malázia sira investe iha Timor-Leste, ne’ebé hatudu dezde 2003 too agora investimentu ne’e sa’e kuaze 200%, no ida-ne’e sinál di’ak ida ba servisu hamutuk ekonomikamente entre nasaun rua.

Jornalista: Vito Salvadór