Hatutan.com, (03 Setembru 2024), Díli- Prezidente Repúblika (PR), José Ramos-Horta kondekora Polísia Australianu no Reinu Unidu hamutuk na’in-15 ho Medalla Solidaridade Timor-Leste, inklui ho Sertifikadu Rekoñesimentu hodi agradese ba sira-nia kontribuisaun ba pás no estabilidade nasionál iha Timor-Leste.

Medalla “Solidaridade Timor-Leste” simboliza agradesimentu ba nasaun sira no sira ne’ebé, husi fatin oioin iha mundu, hala’o papél ativu no importante iha dezenvolvimentu demokrasia iha Timor-Leste nian.

Prezidente Repúblika, José Ramos-Horta kondekora Polísia Australianu no Reinu Unidu hamutuk na’in-15. Foto/Elio dos Santos da Costa 

Haree ba dedikasaun no servisu Polísia Australia no Reinu Unidu nian iha períodu molok no hafoin referendum, no haree ba istória referendum iha loron 30 fulan-Agostu tinan 1999, merese atu hatudu no rekoñese ba pas no seguransa ne’ebé kontribui.

Orezidente Republika ho nia  podér sira ne’ebé prevee iha artigu 85 letra j), Konstituisaun, hamutuk ho artigu 2.” Dekretu-Lei No. 15/2009, loron 18 fulan-marsu, dekreta entrega Medalla Solidariedade Timor-Leste nian no sertifikadu rekoñesimentu ba sidadaun sira tuir mai, David Savage, David Bachi, Shaun Bennets, Greg Corin, Martin Hess, Phil Hutson, Alan Le Lievre, Brendon Withers, Sandra Hoffshchildt, Sandra Chestnut, Michael Holdsworth, Robert Walker, Nicholas Foster, Glenn Longden, Philip Caine.

President Australian Federal Police Veterans Association (PAFPVA), David Savage ba jornalista sira iha Palásiu Prezidensiál Nicolau Lobato, Bairo Pite, Tersa (03/09/2024) hateten, ho governu Austrália nia naran mak iha momentu 1999 mai hala’o misaun iha Timor-Leste ho UNPOL.

“Hakarak dehan katak buat hotu diak,  ami bele fila fali mai Timor-Leste hodi hare oinsa nasaun ne’e dezenvolve ba oin, no kontente hare mudansa bo’ot ba povu nia moris hafoin liu tia momentu tragiku sira 1999,” David Savage hateten.

Nia afirma liután katak hasoru Prezidente Repúblika José Ramos-Horta no simu kondekorasaun nudar rekoñesimentu ba ami nia servisu sira iha tinan 25 liu ba, ne’e hanesan buat ne’ebé importante tebes ba ami. No ida ne’e halo ami sente kontente tebes tamba ami hatene katak estadu, governu no povu ida ne’e fo apresiasaun ba servisu ne’ebé ami halo tinan sira liu ba.

“Ha’u hakarak hato’o apresiasaun ba entidade hotu-hotu, no hakarak ema hotu kontente no moris ho prosperidade iha futuru,” David Savage tenik.

Nia subliña liután katak sei garante atu polísia Austrália sei servisu besik nafatin ho Timor-Leste no sei kontinua sai belun ho Timor-Leste atu kontinua tulun no sai belun diak iha futuru.

 Jornalista: Vito Salvadór