Hatutan.com (28 Outubru 2024), Dilí— Ministériu Interiór (MI) iha planu prioridade no aloka Orsamentu Jerál Estadu (OJE) bá tinan 2025 nian maka sei kontinua fó prioridade bá estabeilidade povu no hadi’a jestaun fronteira.

Ministru Interiór, Francisco Guterres.

Ministru Interiór, Francisco Guterres hateten asuntu ne’e hafoin hala’o audiénsia públiku ho Komisaun B ne’ebé trata asuntu Negosiu Estanjeiru no Defeza Segunrasa iha Parlamentu Nasionál (PN), segunda (28/10/2024).

Lee Mós: Governu Tenke Haforsa Seguransa iha Fronteira Hodi Kombate Movimentu illegál

“Ami-nia objetivu bá 2025 maka kontinua garante seguransa no estabilidade bá povu no nasaun. Signifika, PNTL hala’o ninia servisu investigasaun no halo patrullamentu. Ami mós sei kontinua halo jestaun bá fronteira,” Francisco Guterres hateten.

Tinan ida-ne’e MI sei foku bá Unidade Patrollamentu Fronteira (UPF), katák MI hahú halo rehabilitasaun bá infraestrutura sira no kompleta ekipamentu sira.

“Ko’alia kona-bá fronteira, ami ko’alia mós dezastre iha fronteira oinsá ita ho nasaun viziñu tenki ajuda malu. Ida-ne’e mak ami halo diskusaun hodi mai aprezenta bá PN,” nia tenik.

Ministériu Interiór mós sei halo konsolidasaun bá instituisaun sira hodi hala’o programa prioridade rua ne’ebé trasa ona.

Durante audiénsia públika ne’e mós MI aprezenta kona-bá ezekusaun OJE tinan 2024  nian ne‘ebé atinje ona 75%, no fulan rua nia laran  bele ezekuta hotu ona.

Proposta OJE 2025 ne’ebé Governu aloka bá Ministériu Interiór hamutuk $15.000.336 fahe bá kategoria lima, saláriu no vensimentu $12.276.037, bens servisu $2.158.319, transferénsia públika zero, kapitál Menór $40.184 no kapitál dezenvolvimentu $796.525.

Jornalista Estajiária: Zita Menezes