Hatutan.com, (06 Dezembru 2024), Díli- Prezidente Repúblika (PR), José Ramos-Horta hato’o parabéns ba Prezidente Tribunál Rekursu (PTR), Deolindo dos Santos ne’ebé ho pasiénsia akompaña prosesu konstrusaun edifísiu públiku Tribunál Judisiál Primeira Instánsia Díli (TJPID) to’o remata no bele ona inaugura atu fó fatin di’ak ba juis sira, funsionáriu sira hotu-hotu bele servisu hodi serbí povu di’ak liután.

Lee Mós: Konstrusaun Edifísiu TJPID Hela Porsentu Ida

PR Ramos-Horta inaugura edífisiu foun TJPID, Sesta (06/12/2024). Foto/Elio dos Santos da Costa

Prezidente Repúblika José Ramos-Horta hato’o lia-hirak ne’e iha ámbitu serimónia inaugurasaun edifísiu  foun Tribunál Judisiál Primeira Instánsia Díli (TJPID) ne’ebé lokaliza iha Caicoli, Díli, Sesta (06/12/2024).

“Agradesimentu ba Prezidente Tribunál Rekursu juis Deolindo dos Santos, ba ita-nia esforsu iha tinan sira nia laran, kaer ita-nia instituisaun Tribunál Rekursu iha tinan sira nia laran, no haree ho pasiénsia prosesu preparasaun edifísiu ida-ne’e, ne’ebé fó fatin di’ak ba juis sira, funsionáriu sira hotu-hotu bele servisu ho seguransa no ho konfortu mínimu,  parabéns ba hotu-hotu,” Prezidente Repúblika José Ramos-Horta hateten iha nia diskursu.

Xefe Estadu hatutan iha tinan 20 nia laran estadu buka harii infraestrutura ne’ebé bele simu instituisaun Estadu sira para bele servisu ho di’ak hodi serbí povu ho di’ak.

Iha kondisaun balun iha edifísiu públiku sira iha Parlamentu Nasionál,  Governu no liu-liu Ministériu sira seidauk di’ak, maibé neineik iha tinan sira nia laran ne’e hahú iha edifísiu sira ne’ebé di’ak ho kualidade para jestór polítiku no tékniku sira bele halo servisu ho kondisaun hodi fó atendimentu ba públiku ho di’ak liután.

“Ita inaugura edifísiu Tribunál Judisiál Primeira Instánsia Díli, fulan neen ba tinan ida, bele haree eskritóriu sira, sala sira, haris fatin públiku sira no air kondisionadu sira bele funsiona ho di’ak ka lae, tamba problema boot iha rai ida-ne’e mak manutensaun ba propriedade públiku sira,” Ramos-Horta afirma.

Manutensaun ba proprietáriu públiku sira ne’e kultura laiha no estadu no setór sira hotu-hotu la aprezenta orsamentu ne’ebé di’ak para halo manutensaun ba propriedade públiku sira estadu nian, ne’e hahú husi edifísiu tun too veíkulu ka karreta sira. La iha manutensaun tamba buat sira ne’e estadu nian no la’ós ema ka pesoa sira ne’e utiliza ne’e sira nian.

Prezidente Tribunál Rekursu (PTR), Deolindo dos Santos, ba dala uluk hakarak hato’o agradesimentu ua’in ba Prezidente Repúblika José Ramos-Horta ne’ebé bele iha disponibilidade tomak hodi halo inaugurasaun ba Tribunál Judisiál Primeira Instánsia Díli mesmu iha servisu estadu nia seluk ne’ebé difisil atu fahe tempu.

PR Ramos-Horta ho PTR Deolindo dos Santos ko’a fita edífisiu foun TJPID, Sesta (06/12/2024). Foto/Elio dos Santos da Costa

Nia afirma konstrusaun ba edifísiu Tribunál Judisiál Primeira Instánsia Díli la’o pelumenus durante tinan haat nia laran no Sesta, 06 fulan-Dezembru 2024, hanesan loron istórika ida hodi inaugura edifísiu ne’e.

“Edifísiu ne’e kompleta ho mobiliáriu oin-oin atu fasilita servisu sira Tribunál Judisiál Primeira Instánsia Díli sira nian, ofisiál justisa, funsionáriu tomak ne’ebé sei servisu iha edifísiu ne’e atu kuidadu hanesan uma rasik tamba ne’e halo ho osan povu nian,” PTR Deolindo dos Santos informa.

Konstrusaun TJPID Poupa Millaun $1,500,000.00

Prezidente Tribunál Rekursu (PTR), Deolindo dos Santos, relata perkursu atu too mai inaugurasaun ne’e hasoru dezafiu no impedimentu oin-oin, komesa husi fatin no rai ne’ebé edifísiu ne’e hamriik ba, dezafiu boot liu mak pandemia Covid-19 halo material konstrusaun balun iha Bill of Quantities (BoQ), tenke troka ho material seluk ne’ebé nia kualidade hanesan durante konstrusaun edifísiu públiku ne’e.

Iha mós atividade konstrusaun hapara iha tempu balun nia laran, maibé ho esforsu tomak husi empreza konstrutora, fiskalizadora no PMU inklui ho tékniku sira hotu husi ADN, MOP no Tribunál nia rasik hodi hasoru dezafiu sira ne’e ikus mai iha rezultadu no mere atu apresia.

Implementasaun projetu ne’e, empreza fiskalizadora deteta falla balun mai husi dezeñu rasik tamba iha dezeñu balun labele implementa no tenke halo revizaun maibé tamba servisu hamutuk entre empreza fiskalizadora, konstrutora no PMU hodi halo revizaun ba dezeñu no espesifikasaun sira nune’e ohin bele haree hanesan saida mak iha ne’e.

“Husi kalkulasaun empreza fiskalizadora ka konsultan osan ne’ebé sai hanesan direitu empreza konstrutór nian atu simu hamutuk $9,230,105,94 husi totál valór kontratu inisial $10,990, 771,78 ne’e signifika iha poupansa $1,976,765,74, no tuir kalkulasaun empreza konstrutora nian iha diferensa $310,000.00 husi empreza fiskalizadora nian. No diferensa ne’e sei hato’o ho provas husi empreza konstrutora, maibé ita bele konklui ona katak minimu liu iha poupansa ba orsamentu $1,500,000.00 ne’ebé sei fila ba kofre estadu,” Deolindo dos Santos informa.

Jornalista :Vito Salvadór