Hatutan.com (16 Dezembru 2024), Díli- Reprezentante povu iha Parlamentu Nasionál preokupa ho lixu iha sidade Díli ne’ebé lekar to’o iha estrada, tanba komunidade  seidauk iha konsiénsia soe lixu iha nian fatin apropriadu ka lixeiru ne’ebé mak estabelese ona.

Lee Mós: Timoroan Barak Seidauk iha Konsiénsia Soe Lixu iha Lixeira

Komunidade seidauk iha konsiensia soe faer lolos iha lixeiru laran. Foto/Zita Menezes

Membru PN hosi Bankada FRETILIN, Nurima Alkatiri Ribeiro, hateten tuir nia haree  lixu iha semana nia rohan sira barak no lekar to’o estrada públiku sira, tanba ne’e  presiza autoridade Munisípiu Díli tau atensaun másimu bá asuntu lixu iha sidade Díli laran.

“Besik selebra tempu Natal, lixu sei barak liu entaun importante atu reforsa servisu rekolla lixu iha Díli laran atu garante katák ita nian sidade Díli sei moos nafatin,” Deputada Nurima Alkatriri bá jornalista sira iha PN, Segunda (16/12/2024).

Membru Bankada CNRT, Maria Barreto Gorumali hateten lixu sira ne’ebé mak naklekar iha estrada haree katák husi Governu prepara ona  lixeiru ne’ebé mak ho kondisaun di’ak iha fatin hotu-hotu. Maibé fila-fali bá konsiénsia komunidade nian, konsiénsia komunidade nian rasik mak seidauk bele utiliza fatin lixu ne’ebé mak Governu prepara ona para atu bele tau foer sira ne’e iha nian fatin.

Nia hatutan fatin balu lixu iha tiha ona, maibé komunidade balu lori fo’er bá la hatama iha  lixu nia fatin, ne’ebé Governu prepara ona,  maibé soe hela de’it, nune’e fó servisu ne’ebé todan liubá ema sira ne’ebé servisu ra’ut fo’er.

“Komunidade sira la haree katák bainhira soe fo’er arbiru de’it nia afeta fali mai iha ita nian saúde hamosu lalar no susuk barak, nune’e lori fali moras bá ita ema,” Deputada Maria Barreto hateten.

Jornalista Estajiária: Zita Menezes