Hatutan.com, (16 Dezembru 2024), Díli-Diretora Ezekutiva Ospitál Nasionál Guido Valadares (HNGV), Cecilia Barros Mendonça, informa to’o ohin loron seidauk iha pasiente ka família pasiente mak reklama hodi kestiona kona-bá menu hahán ne’ebé HNGV prepara ba pasiente sira.

Lee Mós: Komisaun F-PN Preokupa Hahán ba Pasiente iha HNGV Uza Produtu Importadu

Cecilia Barros Mendonça, hateten  hahán ne’ebé kompañia fornesedór ai-han ba pasiente sira iha HNGV tuir rekizitu ka padraun ne’ebé haktuir iha kontratu laran entre kompañia ho HNGV haktuir ba rekomendasaun no supervizaun hosi parte nutritivu nian.

Pasiente fase-raan sira halerik iha HNGV. Foto/dok. Hatutan.com

“Ami sei halo enkontru ho kompañia hodi haree di’ak liután. Iha tinan liubá kompañia naran Liquida mak oferese hahán, maibé nia termina tiha ona nian kontratu iha fulan rua liubá, nune’e  kompañia sira mai hatama fali  sira nian kotasaun  maibé sai vendedór mak kompañia ida naran LSM Laklubar mak fornese ai-han bá pasiente sira HNGV, maibé to’o ohin loron ami seidauk simu keixa ka reklamasaun sira dahan ai-han maioria hahán importadu ka hahán balun expire,” Cecilia Barros Mendonça hateten ba jornalista sira iha HNGV, Segunda (16/12/2024), hodi hatán mós  bá preokupasaun membru Parlamentu Nasionál sira nian ne’ebé simu informasaun katak ai-han ne’ebé fornese ba pasiente sira iha HNGV maioria ai-han importadu no hahan balu nia prazu liu ona (expire).

Foin lalais ne’e,  Parlamentu Nasionál liuhosi  Komisaun F ne’ebé trata asuntu Saúde, Seguransa Sosiál no Igualdade Jéneru husu Ministériu Saúde atu tau atensaun bá kompañia hirak ne’ebé fornese hahán bá pasiente sira iha HNGV tanba tuir informasaun ne’ebé iha katak kompañia oferese hahán liu prazu bá pasiénsia sira.

Prezidente Komisaun F-PN, Maria Gorumali Barreto, hateten hosi Komisaun F seidauk haree direita bá  iha kompañia ne’ebé oferese hahán iha HNGV maibé parte AIFAESA halo ona inspesaun ba HNGV hodi haree kondisaun ida-ne’e.

“Kuandu ai-fuan, modo, latria balu, temperus balu ne’ebé  mak liu prazu ho kondisaun dodook ha’u hanoin ida-ne’e irregularidade ida ne’ebé mak kompañia halo kontra kontratu ne’ebé mak entre kompañia HNGV, se ida-ne’e  mak akontese duni, ha’u hanoin rekomenda bá iha Governu liuhosi Ministériu Saúde no HNGV atu tau atensaun bá ida-ne’e,” Deputada Maria Barreto bá hateten ba jornalista sira iha PN, Segunda (16/12/2024).

Prezidente komisaun F-PN ne’e hateten sé kompañia la merese entaun inísiu 2025 bele haree fila-fali kompañia foun ne’ebé mak prepara hahán kualidade tuir nesesidade pasiente sira ne’ebé mak baixa iha HNGV.

Iha fatin hanesan, membru PN hosi Bankada FRETILIN, Nurima Ribeiro Alkatiri, haktuir durante ne’e iha plenária sempre foti kestaun bá hahán ne’ebé fó bá pasiente sira iha Ospitál tanba tuir deputada ne’e nia vizita bá  pasiente sira haree katák hahán la prienxe rekizitu nutritivu bá pasiente sira.

“La’ós problema hahán importadu ka hahán lokál de’it, maibé  problema ita fó hahán depende bá pasiente ida-idak nia moras, tenke haree vitamina saida mak presiza hosi hahán mak bele prepara hahan,” Deputada Nurima Ribeiro Alkatiri hateten..

Nia hateten ho identifikasaun AIFAESA nian halo agora bá produtu liu prazu importante tebes atu diresaun ospitál fó atensaun liután problema ida-ne’e bele hadi’a, atu garante katák  pasiente iha hahán dignu no iha hahán ne’ebé nutritivu.

Jornalista Estajiária: Zita Menezes