Hatutan.com, (19 Dezembru 2024), Díli—Asidente tráfiku ne’ebé akontese iha área Karavela, Postu Administrativu Vemasi, Munisípiu Baucau, 18 fulan-Dezembru 2024, rezulta joven na’in-rua lakon vida no na’in-31 seluk kanek kaman.

Lee Mós: Asidente Karreta Estadu iha Kakaulidun Nia Prosesu La’o Hela

Asidente tráfiku iha área Karavela, Postu Administrativu Vemasi, Munisípiu Baucau, 18 fulan-Dezembru 2024. Foto/Espesiál

Asidente tráfiku ne’e entre karreta ho marka  Hilux kor-mean ho númeru matrikula A.14-454 TLS soke bus diresasun Baucau-Dili ho númeru matríkula 38-076 TLS, hodi rezulta joven Nataniel Inocensio Baquita Lemos mate fatin.

Informasaun ne’ebé Hatutan.com sita hosi Rádiu Komunidade Lian Matebian Baucau (RCLM, sigla portugés) haktuir Komandante Polísia Nasionál Timor-Leste (PNTL) Munisípiu Baucau, Superintendente Xefe Polísia António Maria de Sa, katak motivu husi asidente fatal ne’e tanba motorista  hosi karreta marka Hilux kor-mean halai ho velosidade no falta kontrolu hodi kauza matan dukur nune’e hamosu asidente ne’ebé la espera.

“Motorista ho idade tinan 25 ho naran Nataniel Inocensio Baquita Lemos mate fatin ho nia maluk ida tuur iha sorin ho naran Proferio Francisco Soares transporta hosi lokál asidente mai  Ospitál Referral Eduardo Ximenes (HoREX) mak hakotu iis,” Superintendente Xefe Polísia António Maria de Sá informa.

Karreta Hilux ne’e iha ema nain-haat;  na’in-rua mate no na’in-rua seluk kanek todan. Enkuantu  husi parte karreta bus nia motorista ho naran Idelfonsu Sebastiao da Costa (tinan 39) hetan pankada makaas iha parte ain loos no pasajeiru ida ho naran Ozorio Filomeno de Sousa (tinan 41) nia kondusaun hetan bubu iha ain parte loos.

Pasajeiru bus nian sira seluk ho kondisaun kanek kaman, maibé trauma tanba asidente fatal tebes hodi rezulta karreta Hilux nia oin rahun total no karreta bus nia oin sorin balun nakbetok no vidru boot rahun hotu.

Polísia Nasionál Timor-Leste Munisípiu Baucau liu hosi ekipa Seksaun Tranzitu to’o kedas lokál akontesimentu hodi halo identifikasaun no transporta vítima sira emerjensiamente mai halo tratamentu intensivu iha HoREX.

Komandu PNTL Baucau konsidera tipu a asidente iha Kairavela ne’e trafiku asidente omesidiu neglijente no danus agravadu neglijente no mós ofensa integridade fiziku neglijente tanba iha asidente ne’e karreta rahun hodi efeitu ba kondisaun ema no balun lakon vida.

Hosi sorin seluk, Médiku Jerál HoREX Baucau, Bazilia Freitas informa vítima asidenti iha Kairavela ne’ebé transporta ba HoREX hamutuk na’in-15, kompostu hosi  na’in-rua kontinua transfere ba Ospitál Nasionál Guido Valadares (HNGV) tanba kondisaun grave ho trauma capities, nune’e presiza halo CT Scan.

“Asidente Karavela akontese hale’u tuku 16:liu Otl, vítima na’in-15  mak evakua mai halo tratamentu intensivu iha HoREX, nune’e na’in-rua ba evakua hikas  ba HNGV, na’in-ida mate fatin, na’in-tolu agora nafatin baixa iha HOREX tanba tohar no  na’in-sia (9) mak horseik observasi nia kondisaun kaman entaun fila kedas,” Bazilia Freitas informa.

Relasiona períodu  Natál no Tinan Foun 2025, komandu PNTL Munisípiu Baucau alerta ba komunidade no pasajeiru sira ne’ebé viajen ho karreta no motór liu-liu motorista sira tau atensaun bainhira halo movimentu. ***