Hatutan.com, (31 Dezembru 2024), Díli- Arsebispu Arkidioseze Metropolitana Díli, Dom Virgílio Kardeál do Carmo da Silva, SDB iha nia omilia ba missa “Te Deum” iha Igreja Parokia Imaculada Conceição, Katedrál, Díli, Tersa kalan (31/12/2024), hateten halibur hamutuk iha ne’e atu agradese ba grasa no bensan sira tinan 2024, hodi hamutuk hakat ba simu tinan foun 2025 ho ksolok no esperansa.

Lee Mós: Karta Pastoral CET bá Tempu Adventu-Natal 2024, Exorta Pontu Importante Lima

Dom Virgílio Kardeál do Carmo da Silva, SDB. Foto/Elio dos Santos da Costa

Arsebispu Arkidioseze Metropolitana Díli, Dom Virgílio Kardeál do Carmo da Silva, SDB iha nia omilia hateten ema hotu sei tama ba tinan foun no  2024 sei liu, husik hela memória, husik hela istória. Momentu furak atu hateke ba kotuk, biban atu hadi’a, no hateke ba oin hodi kontinua hakat ba oin.

Tinan 2024 nia memória dalaruma bele husik hela esperiénsia balun karik moruk, balun nian husik hela kanek oan ruma karik, bele mós ba balun iha fallansu barak ne’ebé mosu iha servisu, relasaun sira, maibé haree ba tinan 2024, ema ida-idak koko momentu ksolok lubuk ida, ne’ebé ema ida-idak hasoru, balun ksolok ne’ebé lori progresu ba an rasik no grupu, susesu no konkista sira ne’ebé halo orgullu.

“Ita bele dehan kalan ida ne’e sai hanesan kalan atu fó obrigadu, kalan atu agradese. Tinan 2024 oras-oras tan sei liu, furak mós ba ita ida-idak, iha tinan ne’e, ita bele husu ba ita án rasik, esperiénsia saida mak ha’u hetan iha 2024, valór ka sentidu ba ha’u mak saida. Iha buat ruma konkretu ha’u bele kaer, bele sukat. Buka no haka’as án atu aproveita oportunidade hotu ne’ebé iha no hakat ba simu tinan foun 2025 ho ksolok no esperansa,” Dom Virgílio esplika.

Hakarak ka la kohi, tinan 2025 too mai daudaun, mai hamutuk hakat ba tinan 2025 ho hakat ksolok nian, hakat esperansa nian. Hanesan tinan 2025 ne’ebé Papa Francisco hanaran “Jubileu da Esperança”.

Tinan foun signifika Maromak fó ba Nia povu oportunidade ida tan atu krexe, la’ós iha isin de’it, iha neon de’it, maibé mós iha espíritu, atu ema bele aproveita hodi mellora liután nia an, atu hatene nu’udâr ema, Maromak nia kriatura, pelu menus oportunidade atu bele hatene Maromak, hadomi no atu bele serbí Maromak iha ida-idak nia kontestu. Iha família, servisu fatin no seluk-seluk tan.

Tinan foun hanesan momentu sira ne’ebé konvida ema, maske iha ta’uk barak maibé bele loke liman ba oportunidade no posibilidade sira ne’ebé sei mai.

Ema la hatene saida mak sei mosu, maibé ohin ita mai atu agradese tamba Maromak fó buat barak ona ba ita. Ohin ita mos hakarak atu harohan atu Maromak tulun ita fó liután sentidu ba selebrasaun ohin kalan nian.

Hakarak konvida sarani sira hotu atu hanoin kona-bá leitura ohin nian iha primeira leitura husi Livru Ben Sira (Bin Sirakh) ne’ebé ko’alia kona-bá tempu, iha tempu atu moris, iha mos tempu atu mate, iha tempu atu ko’alia, iha mós tempu atu nonok no rona, iha atu hadomi, iha tempu atu hari dame. Tamba ne’e iha leitura ne’e atu hanorin ema katak los dunik ema ne’e moris iha tempu ida nia laran. Iha hun no iha mos rohan.

Iha segunda leitura mós bolu ema nia atensaun no fó deskrisaun ida kle’an kona-bá pasajen leitura ida kle’an katak “ha’u hakerek ba imi laos tamba imi la hatene maibé tamba imi hatene dunik katak lia bosok la mai husi lia-loos.”

Husi esperiénsia moris, ema hotu hatene katak loos dunik ema nu’udár kriatura Maromak nian, moris ne’e mai husi Maromak de’it, maibé hanoin fila fali ba istória salvasaun nian oinsá mak samea lori promesa falsu ba Eva no Adão hodi muda sira nia moris. Ne’e hatudu katak lia-bosok ne’e mak dala barak sai obstákulu ba ema no ema mós lori hela tendénsia boot ida ne’e, hodi hanoin katak ita mak na’in no autór ba ita nia moris rasik.

Iha Evanjellu husi São João ko’alia kona-bá oinsá Jesus prepara nia apóstolu sira. São João hakarak hateten momoos kona-bá João Baptista ne’ebé fó sasin kona-ba naroman ne’e.

“Mai ita tama ba tinan foun 2025, la’ós ho ahin ne’ebé ema halo ho liman, la’ós mós ho fogete nia naroman, la’os mós ho painxón nia tarutu, maibé ho naroman natal ninian, Maromak Kosok oan nian ne’ebé mai atu fó fali esperansa ba ita, Nia mak naroman mundu nian, liurai dame na’in nian,” tenik Kardeá Do Carmo da Silva.

Kada tinan, iha loron 01 fulan-Janeiru, amu Papa sempre husu atu sarani hotu hanoin kona-ba Pás, no iha loron ne’e mós loron boot liu, selebra solenidade Maromak Nia Inan nian.

Iha loron mundiál Pás ba dala-58 amu Papa tau mensajen ho títulu “Haraik Perdua ba Ami Sala Sira, Haraik Ita Nia Pás mai Ami”. Iha tinan foun ne’e mos amu Papa husu atu ema hotu bele rona mos ema ki’ik no kiak sira nia hakilar, ne’ebé nu’udár mos bolu ida atu ema ida-idak hola responsabilidade, atu hotu-hotu hamutuk kore korrente injustisa, hodi haklaken fali justisa Maromak nian.

Jornalista: Vito Salvadór