Hatutan.com, (08 Janeiru 2025), Díli– Komandu Polísia Nasional Timor-Leste (PNTL), Departamentu Servisu Informasaun Polísia (DSIP),  Tersa (07/01/2025), kaptura joven mane na’in-tolu ne’ebé sai suspeitu bá kazu foti sarani sira-nia motór ne’ebé estasiona  iha área Igréja Balíde, Díli.

Lee Mós: Tribunál Aplika TIR-AP Bá Arguido Ne’ebé Na’ok Motór

Polísia kaptura suspeitu na’in-tolu foti motór ne’ebé estasiona iha área Igreja Balide, Díli. Foto/PNTL

Xefe Departamentu Investigasaun Kriminal Nasional (DIKN) Superintendente Polísia João Belo dos Reis, informa polísia kaptura joven na’in-tolu ne’e hale’u tuku 14:30 Otl, iha área Merkadu Taibessi nian.

Kapturasaun bá suspeitu sira ne’e ho baze bá keixa ne’ebé vítima sira hato’o tanba sira-nian motór ne’ebé estasiona iha estrada ibun área Igreja Balide nian partisipa missa Natál kalan, 24 Dezembru 2024, lakon. Ho nune’e, PNTL nia Servisu Informasaun sira halo movimentu  hodi deteta no lokaliza suspeitu sira nia paradeiru iha área Merkadu Taibesi nian.

“Informasaun ne’ebé ita-nia vítima hato’o bá Polísia liuhosi Servisu Informasaun Polísia halo tracking buka tuir paradeiru hosi suspeitu no motorizada ne’ebé mak sira foti  lori mai iha DIKN hodi entrega bá Ministeriu Publiku (MP),” Superintendente Polísia João Belo dos Reis, informa bá Jornalista sira liuhosi konferénsia imprénsa iha Kuartel Jerál PNTL, Kuarta (08/01/2025).

Suspeitu na’in-tolu ne’e ho inisiál JMS alias Uben (tinan 17), JMM alias Aberek (tinan 19) ho suspeitu ida seluk ho inisiál SX alias Alelok (tinan 17).

Informasaun seluk ne’ebé Hatutan.com rekolla hosi fonte balu, katak, durante kapturasaun iha terrenu, Suspeitu JMS deklara katak, sira na’in-tolu rasik maka halo planu ho inisiativa uza maneira sobu no dudu sai motór ne’ebé estasiona iha Igréja Balíde bainhira vítima para hela motór hodi ba hola parte misa Natal.

Suspeitu sira ne’e mós konsege na’ok tán kapasete sarani sira nian hamutuk haat (4) ne’ebé xáve hela ho motór iha estrada ninin no sira fa’an tiha ona kapasete rua ne’e ho présu ne’ebé baratu tebes.

Kazu ne’e rasik rejístadu ho Númeru Kríme, NUC 0012/25.PNSIC. Suspeitu na’in-tolu ne’e detein ona iha sela detensaun Eskuadra Dom Aleixo, durante oras 72, molok aprezenta bá Tribunál Dili, hodi submete bá prosesu interogatóriu judisial.

Durante identifikasaun, Investigadór sira deskobre katak, suspeitu sira ne’e balu antigu no balun foun. Tanba ne’e Komandu PNTL liuhosi DIKN nafatin fó hanoin bá públiku katak Polísia sei la fó espasu bá sidadaun ka suspeitu é de’it mak halo kríme organizadu sira hodi na’ok ema nia sasán iha kapitál nasaun no Munisípiu.

Jornalista: Rogério Pereira Cárceres