Hatutan.com, (14 Janeiru 2024), Díli—Asosiasaun Tane Konsumidór husu ba governu atu halo kontrolu másimu ba presu sasan nesesidade baziku sira ne’ebe empreza importador sira importa mai.

Prezidente Asosiasaun Tane Konsumidór, Robin Araújo. Foto/Leopoldina de Carvalho

Bazeia ba rezultadu  peskiza iha trimestre da-haat tinan 2024 identifika presu sasan bazika balun sae la tuir padraun lei ne’ebé vigora.

Prezidente Asosiasaun Tane Konsumidór, Robin Araújo ba Hatutan.com iha nia knar fatin, Tersa (14/01/2024), hateten governu presiza iha adidu ne’ebé bele akompaña empreza importador sira tantu iha rai-laran no rai-li’ur nune’e bele halo kontrolu másimu ba presu sasan nesesidade báziku sira ne’ebe importa mai Timor-Leste.

Tane Konsumidór mós simu keixa husi konsumidór sira kona-bá presu sasan baziku ne’ebe la hanesan entre loja ida ba loja seluk, maske loja sira ne’ebe hanesan,  nune’e nia konsidera katak presu sasan hirak sa’e tanba laiha kontrolu ne’ebe másimu.

 Tane Konsumidór iha hela prosesu preparasun hodi direitamente halo advokasia ba loja hirak ne’e, hodi bele buka hatene kauza ba mudansa presu sasan baziku tanba iha empreza barak sidauk hatene lolos kona lei presu justu lei-númeru 29/2011.

Daudaun ne’e Tane Konsumidór ho AIFAESA no mós diresaun nasional regulasaun komersial no protesaun konsumidores (DNRKPK) Ministeriu Komersiu no  Industria (MCI), SERVE, ho mós parte saúde  iha hela esforsu hamutuk hodi halo kontrolu ba hahan prazu iha loja sira, AIFAESA hanesan parte kompetente ne’ebé iha lei forte hodi haree ba kestaun id- ne’e, no Tane Konsumidór hanesan asosiasaun haree ba konsumidor sira.

Jornalista : Leopoldina de Carvalho