Hatutan.com, (28 Janeiru 2025), Díli- Prezidente Repúblika (PR), José Ramos-Horta, hateten Prezidente Autoridade Munisípiu (PAM) Díli, Gregório Saldanha rezigna an tanba la konkorda ho Sekretáriu Estadu Asuntu Toponímia Organizasaun Urbana (SEATOU), Germano Santa Bristes nia servisu.

Lee Mós: Ministru Tomas Cabral Enkamiña Pedidu Renunsia Kargu PAM Díli ba PM Xanana

Prezidente Repúblika, José Ramos-Horta. Foto/GPR

Prezidente Repúblika, José Ramos-Horta konsidera Prezidente Autoridade Munisípiu Dili, Gregório Saldanha da Cunha rezigna-an husi nia kargu tanba la konkorda ho atitude Germano Santa Brites nia servisu halo eviksaun hakarak hasai ema la halo diálogu didi’ak, ko’alia didi’ak, buka kedas solusaun, sira sai husi iha ne’e atu ba ne’ebé, halo kompensasaun depois ida-idak bele ba buka fatin ne’e mós di’ak, mas entrega tiha lai osan ne’e mak depois lori track organiza didi’ak, la’ós halo hanesan Germano halo lori kedas polísia, militár, lori PNTL sobu, baku ema ne’e.

Ba jornalista sira iha Kantina Matak Palásiu Prezidensiál, Tersa (28/01/2025), Prezidente Repúblika José Ramos-Horta, argumenta komunidade sira fa’an modo iha lurón, husik ba sira la atrapalla ema ruma, se mak atrapalla karreta sira para arbiru de’it ne’e, iha Dili laran haree hela polísia la book an.

Karreta no motór para arbiru, balun hatene estrada prinsipál labele para, sira para iha ne’e, polísia nunka haree, ba buka mak duni ema sira fa’an-sasán, entaun governu devia halo merkadu ne’ebé kualidade, merkadu foun mas devia modernu, di’ak halo iha bairru-bairru ne’ebé kualidade, la’ós ida de’it, tanba ida de’it imposivel, tenke halo merkadu ida di’ak iha kada bairru ka kada suku.

Se ema fa’an iha Estrada bele husik ba, tenke organiza sira, fatin estrada ne’ebé bele hela, husi tuku hira to’o tuku hira mak bele, saneamentu Munisípiu Dili ba loro-loron tenke ba hamoos, bainhira merkadu ne’e taka ona munisípiu tama kedas nune’e hamoos, la’ós ba tebe ema, duni ema arbiru.

“Tanba buat sira ne’e mak ha’u hanoin Prezidente Autoridade Munisípiu Dili rejigna-an.” Ramos-Horta subliña

Prezidente Repúblika ne’e mos husu ba populasaun favór labele hela iha mota-laran, mota-ninin sira ne’e. Labele okupa rai arbiru, fatin oan balun iha estrada ninin ba Metiaut no Área Branka mós nune’e, fatin hotu-hotu.

Iha foho-lolon sira ne’e halo uma arbiru, primeiru problema ida perigozu loos,  haree de’it foho-lolon sira ne’e bainhira inundasaun tinan-rua, tolu liubá ne’e uma lubuk ida mak monu.

Sosiedade Sivíl Apresia Desizaun Gregorio Saldanha

Diretór Ezekutivu FONGTIL, Valentim da Costa Pinto hateten karta rezignasaun mai husi Prezidente Autoridade Munisípiu Díli nian, hodi husu rezignasaun, ne’e hatudu kona-ba nian kompromisu ba promove kontabilidade, transparénsia servisu no responsabilidade morál ba nian kna’ar sira ne’ebé halo.

“Ida-ne’e buat ruma ne’ebé di’ak, inklui ida-ne’e mós bele halo mai husi lider sira seluk ne’ebé kuandu iha tentativa sira ne’ebé bele afeta ba nia komportamentu servisu, di’ak liu halo saida hanesan Prezidente Autoridade Munisípiu, Gregório da Cunha Saldanha “Mouris” halo, ida ne’e mai ami hatudu buat di’ak loos,” Diretór Ezekutivu FONGTIL, Valentim da Costa Pinto hateten.

 Ho rezignasaun ida-ne’e di’ak loos, hatudu  katak autoridade ida ne’ebé brani halo kritika ba nian an no mós halo kritika ba públiku, buat ida ne’ebé sai ezemplu di’ak ba futuru, hatete loloos saida mak sala no hatete loloos saida mak la’o la loos, ida ne’e hatudu lider ida ne’ebé firme ba nia kompromisu ba nian vontade ida ne’ebé nia halo, mais kuandu ida ne’e ladún fasilita nian kna’ar sira ne’e, tanba ne’e mak nia husu rezignasaun ne’e, dala ida ne’ebé di’ak liu no dala ida ne’ebé sei asegura ba Gregório da Cunha Saldanha “ Mouris” integridade pesoál no nia karreira polítika sira ba futuru.

Espera katak pesoál balun ne’ebé sei substitui ba PAMD atuál Gregório da Cunha Saldanha “ Mouris”, sei bele halo kna’ar ida ne’ebé di’ak liu, la’ós mai atu halo servisu yes man,  ka halo tuir de’it saida mak ukun na’in sira hato’o.

Vise-Diretór Dahuluk Asosiasaun Hak, Antonino de Lima apresia ba desizaun Prezidente Autoridade Munisípiu Dili, Gregório Saldanha da Chuna ne’ebé foti desizaun rezigna-an husi nia pozisaun.

“Ha’u hanoin ida ne’e ninia konsiénsia rasik, se ita haree ba kotuk ha’u hanoin rezignasaun ne’e bele mós relasióna ho servisu ne’ebé nia halo, kna’ar ne’ebé fó ba ne’e hanesan PAM Dili nian, maibé iha implementasaun servisu balun liu-liu ligadu ho eviksaun sira ne’ebé akontese hahú Aitarak Laran, Bidau, ikus liu Fomento II ne’e ha’u hanoin husi notísia ne’ebé ita asesu Prezidente Autoridade Munisípiu Dili nia pozisaun hakarak despeju administrativu ne’e tenke la’o ho lei ne’ebé eziste,” Antonino de Lima hateten.

Tanba lei hatete bainhira muda komunidade sira sai husi sira nia hela fatin governu tenke kria kondisaun, buat ne’ebé akontese la’o hanesan espetativa ema barak nian no la’o tuir lei ne’ebé eziste, tanba ne’e mak iha komunikasaun sosiál dala barak asesu Prezidente Autoridade Munisípiu Dili ninia deklarasaun ne’e la hanesan ho saida mak SEATOU ne’e haree katak iha kontradís ba servisu ne’ebé hanesan ba asuntu eviksaun ne’e.

Jornalista: Vito Salvadór