Hatutan.com, (07 Fevereiru 2025), Díli-Minstériu Administrasaun Estatál (MAE), Sesta (07/02/2025), hahú distribui komputadór bá unidade 445 ba suku  sira iha territóriu Timor-Leste.

Lee Mós: Xanana Husu Xefe Suku Lori Povu bá Moris Hakmatek

MAE distribui komputadór ba suku sira iha territóriu nasionál, Sesta (07/02/2025). Foto/Zita Menezes

Diretór Nasionál Apoiu Administrasaun Suku Ministériu Administrasaun Estatal (MAE),  Celestino Marques hateten MAE  sosa komputadór unidade  755 hodi bele  reforsa servisu  suku sira no  husi komputadór hirak ne’e, MAE sei  aloká  komputadór 445  bá suku hamutuk  466 suku.

“Komputadór sira ne’ebé simu ona bele utiliza bá hatama dadus ka atualiza dadus no servisu administrasaun suku nian,” Diretór DNAAS, Celestino Marques informa iha ámbitu  distribui simbolikamente komputadór unidade 31 ba suku sira iha Munisípiu Díli.

Bá suku foun 14 ne’ebé foin harii iha 2023-2024, MAE sei aloka komputador unidade rua ba kada suku, nune’e, komputadór ida uza bá hatama dadus sistema integradu gestaun informasaun suku no aldeia (SIGISA) no ida fali bele uza hodi halo atendimentu bá gestaun atendimentu administrasaun suku nian.

Diretór Jerál Desentralizasaun Administrasaun Estatál (MAE), António Guterres hateten komputadór ne’ebé autoridade lokál sira simu ne’e atu fasilita autoridade lokál sira nian servisu iha suku atu bele fornese lalais dadus suku no demografia suku  nian bá nasionál bainhira prezisa.

“Lori komputadór ne’e bá suku ida-idak tau iha sede suku ho kuidadu no seguru hodi uza  responde bá espetativa komún no nesesidade povu nian iha suku ne’ebé ita-boot sira lidera iha suku ida-idak,” antigu Prezidente Autoridade Munisípiu Baucau ne’e hateten.

Iha fatin hanesan Xefe Suku Sabuli, Postu Administrativu Metinaro, Agus da Costa Oliveira,  hateten nu’udár autoridade lokál orgullu no  agradese bá Governu bá komputadór ne’ebé sira simu tanba bele fasilita sira nia servisu suku. Basá, durante ne’e xefe suku sira sempre preokupa ho komputadór.

Jornalista Estajiária: Zita Menezes