Hatutan.com, (24 Fevereiru 2025), Díli- Prezidente Repúblika, José Ramos-Horta, Segunda (24/02/2025), hala’o vizita ofisiál ba Vietnam hodi partisipa iha Forum Futuru Association of Southeast Asian Nation (ASEAN) 2025.

Lee Mós:Ramos-Horta husu Governu Austrália Kontinua Simu Traballadór Timoroan 

Prezidente Repúblika, José Ramos-Horta. Foto/Dok.Tome da Silva

Vizita ofisiál Prezidente Repúblika José Ramos-Horta nian ne’e hahú husi loron 24 to’o  loron 26 fulan-Fevereiru ne’e no tema ba Fórum ne’e radis mak “Harii ASEAN ne’ebé Unidu, Inkluzivu no Reziliente iha Transformasaun Global sira-nia leet” .

Komunikadu ba imprensa  ne’ebé Hatutan.com asesu husi Gabinete Média Palásiu Prezidensiál, relata Forum Futuru  ASEAN ne’e sei halibur lider rejionál sira atu diskute kona-ba futuru ASEAN nian no responde ba dezafiu xave sira ne’ebé rejiaun hasoru.

Prezidente Ramos-Horta sei hala’o enkontru bilateral nivel aas ho lideransa Vietnam nian, inklui Sua Exelénsia Luong Cuong, Prezidente Vietnam, no Sua Exelénsia To Lam, Sekretáriu Jerál Partidu Komunista Vietnam nian. Enkontru hirak-ne’e sei hametin ligasaun diplomátika entre Timor-Leste no Vietnam, no sei avansa diskusaun kona-ba kooperasaun no dezenvolvimentu rejionál.

Iha Forum Futuru ASEAN nian, Prezidente Ramos-Horta sei hato’o diskursu prinsipál iha serimónia abertura Forum nian no partisipa iha sesaun Q&A nivel aas hamutuk ho: Primeiru-Ministru Vietnam nian, Pham Minh Chinh, Primeiru-Ministru Malázia nian, Rt. Hon. Dato’ Seri Anwar bin Ibrahim, no Primeiru Ministru Nova Zelándia, Rt. Hon. Christopher Luxon

Forum Futuru ASEAN 2025 serve hanesan plataforma signifikativu ida ba diálogu rejionál kona-ba asuntu krítiku sira inklui avansu teknolójiku, seguransa abranjente, no papél ASEAN nian iha paizajen globál ida ne’ebé kompleksu ba beibeik.

Partisipasaun Timor-Leste nian iha Forum ne’e subliña ninia kompromisu ba integrasaun rejionál no ninia viajen la’o hela ba adezaun ba ASEAN. Nasaun kontinua halo progresu signifikativu iha prosesu adezaun.

Fórum Futuru ASEAN reprezenta plataforma importante ba diálogu no kolaborasaun hanesan ita servisu hamutuk atu harii Sudeste Aziátiku ne’ebé integra no reziliente liu,” Prezidente Ramos-Horta hateten.

“Partisipasaun Timor-Leste nian refleta ami-nia kompromisu metin ba kooperasaun rejionál no ami-nia prontidaun atu kontribui ho signifikativu ba vizaun komún ASEAN nian ba dezenvolvimentu sustentavel no prosperidade. Hanesan ami progresu iha ami-nia viajen adezaun ba ASEAN, ami hakarak servisu besik ho ami-nia viziñu sira atu rezolve dezafiu komún no kaer oportunidade sira ba kreximentu koletivu,”.

Nu’udar nasaun ne’ebé kompromete ba dezenvolvimentu sustentavel no kooperasaun rejionál ne’ebé aumenta, Timor-Leste hakarak kontribui ba diskusaun sira kona-ba mudansa klimátika, tranzisaun enerjia, no hametin reziliente rejionál liu husi asaun koletivu no kolaborasaun.

Prezidente nia delegasaun inklui ofisiál superiór sira governu nian husi Ministériu Negósiu Estranjeiru no Kooperasaun, ne’ebé hatudu Timor-Leste nia kompromisu maka’as atu envolve ho parseiru rejionál sira no kontribui ba vizaun kompartilla ASEAN nian ba futuru.

Jornalista: Vito Salvadór