Hatutan.com, (25 Fevereiru 2025), Díli–Ekipa Servisu Informasaun Sekreta (UIS) no Investigasaun Kriminál (UIC) husi Komisaun Anti-Korrupsaun (CAC-portugés) hamutuk ho Polísia Nasionál Servisu Investigasaun Kriminál (PNSIK), Tersa (25/02/2025), bolu obrigatóriu dirijente na’in-ualu (8) iha Serviço de Registo e Verificacao Empresarial Institutu Publiku (SERVE, I.P.) hodi mai presta deklarasaun no tuir prosesu identifikasaun iha Edifísiu Sentral CAC, Faról, Díli.

Lee Mós: Diretór Ezekutivu SERVE,I.P Fausto Soares Dias Rejeita Halo Kobransa

Ekipa CAC ho PNSIK bolu obrigatóriu direjente SERVE,I.P na’in-ualu hodi presta deklasasaun, Tersa (25/02/2025). Foto/Tome da Silva

Dirijente ho funsionáriu  SERVE, I.P. na’in-lima (5) ekipa Investigasaun Kriminál CAC reforsa  husi PNSIK bolu obrigatóriu iha dadaran no na’in-tolu (3) seluk bolu iha oras loraik.

 Asaun polisiál  CAC ho PNSIK nian ne’e atu ekipa Investigasaun kriminál CAC nian halo identifikasaun no rekolla informasaun preliminaria ba sira durante oras balun nian-laran iha edifísiu sentrál CAC tuir Lei Kódigu Prosesu Penal Artigu 53.

“Iha SERVE, I.P ne’e ha’u hanoin maluk sira hatene tanba informasaun sira esplla nune’e hosi ita nia maluk sira ne’ebé mak hato’o keixa no mós informasaun ne’ebe mak CAC rasik inisiativa hodi rekolla presiza ita follow-up ne’e mak dehan Diretór Ezekutivu ho nia emar sira balu halo buat ruma laloos, maibé ita labele rona de’it mas ita presiza hakle’an investigasaun atu haree verdade krime ruma akontese ka lae,” Komisariu CAC, Rui Pereira hateten ba jornalista sira.

CAC tenke la’o tuir regra atu nune’e labele halo prosesu arbiru tanba ne’e mak tenke kumprimentu ba prosesu penal ne’ebe mak iha.

“Identifikasaun ne’e liga ho kazu ne’ebe mak iha alegasaun hasoru sira ha’u hanoin ita-bo’ot sira hatene iha WhatsApp no vídeo sira viral ne’e tanba ne’e iha informasaun ruma mós ita deskonfia katak iha buat ruma mosu laloos iha ne’ebá hanesan prosesu rekrutamentu ema balu dehan halo kobransa,” Rui Pereira esplika.

Rui Pereira hatutan, depois rekolla informasaun sira hotu mak iha indísiu krime ruma entaun tenke halo partisipasaun ba iha Ministériu Públiku atu haree tanba formalmente se delegasaun tun mai tenke haree ba regra sira ne’ebé mak iha no prazu ba tempu ne’ebe mak iha.

Husi sorin seluk, Xefe Investigasaun Kriminál, Euclides Vidal Madeira hateten prosesu identifikasaun sei hala’o durante oras 12 nian laran. Se durante prosesu identifikasaun mak iha evidénsia no prova sufisiente mak ekipa sei husu ba prokuradór hodi halo mandadu detensaun.

“Se faktu no evidénsia la to’o tuir lei kódigu prosesu penal, hakarak ka lakohi, tenke liberta hodi tuir prosesu fali prosesu normal,” Euclides Vidal Madeira tenik.

Jornalista Estajiáriu : Lazaro Pereira Quefi