Hatutan.com (11 Marsu 2025), Díli– Xefe Bankada PLP, Maria Angelina Sarmento kestiona kustu manutensaun Ró Berlin Nakroma $785,000.

Lee Mós: Ró Berlin Nakroma Hetan Asidente iha Surabaya

Ró Berlin Nakroma atraka hela iha Portu Díli, Tersa (11/06/2024). Foto/Tome da Silva

Nia hateten iha Governu anteriór kustu manutensaun ba Ró Berlin Nakroma $200,000 maibé iha ne’ebé iha Governu ida’nee iha diferénsia to’o kedas $785,000.

Liuhusi plenária Parlamentu Nasionál, Tersa (11/03/2025),  Xefe Bankada PLP ne’e aprezenta mós informasaun ne’ebé nia parte simu katák manutensaun bá Ró Berlin Nakroma iha Indonézia haan tiha tempu kuazé fulan-lima ona, bá kedas iha fulan Outubru to’o ohin loron ró seidauk fila mai Timor.

“Kustu bá manutensaun ne’e hamutuk $785,000 ne’ebé  ita kompara ho kustu manutensaun iha Governu anteriór nian ne’e gastu de’it $200,000. Entaun pergunta boot tanba saida mak ró ida ne’ebé mak kondisaun hanesan maibé nian manutensaun ida uluk $200,000 maibé ida agora ne’e to’o tiha $785,000,” Deputada Maria Angelina Sarmento iha nia intervenzaun.

Nia kestiona mós  katák bainhira ró Berlin Nakroma bá atraka iha fatin ne’ebé atu halo manutensaun ka bolu dehan Doka  (docking) kuandu ró ne’e atu atraka iha ne’ebá para ladún di’ak entaun  anin makaas halo ró ida mai soké tán  ró seluk. Atu dehan katák ró ne’e nia manutensaun bá ida-ne’e mós ladi’ak tanba ne’e presiza halo investigasaun normlamente kuandu sira uzá razaun dehan forsa natureza ka anin boot, maibé normalmente kuandu ró ida atu atraka iha fatin ida tenke hatene katák kondisaun iha areá sira sori-sorin.

Nia preokupa mós katák  tripulante na’in-ualu (8) ne’ebé durante ne’e servisu iha Ró Berlin Nakroma no Ramelau ne’e hapara hotu no  rekruta hotu fali tripulante sira husi  Indonézia mak mai kaer Ró sira ne’e.

“Iha de’it Timoroan ida ka rua mak tama hamutuk ho tripulante Indonézia no Timoroan na’in-ualu (8) ne’e sira hapara hotu sira nia kontratu, ne’e pergunta tanba saida?” Nia lamenta.

Rekrutamentu bá ema sira servisu iha Ró Berlin Nakroma ne’e rekrutamentu feixadu no la aberta bá públiku, tripulante Timoroan sira dehan sé fó sai rekrutamentu ne’e aberta karik sira mós prontu atu halo kompetisaun

Vise-Minstru Asuntu Parlamentár Adérito Hugo da Costa hateten, informasaun ne’e  sei envia bá Minstériu Transporte no Telekomunikasaun (MTK) kestaun teknikú mais detallu liu kuandu kustu bá Manutensaun ne’ebé Deputada PLP foti manutensaun hanesan bá ró hanesan ho antes $200,000.

“Maibé agora ho mais $785,000 ne’e diferensia ida boot tebes maibé ha’u labele fó justifikasaun ruma no guarda resposta husi Ministru MTK bá asuntu ida-ne’e,”Hateten Adérito Hugo da Costa.

Kestaun tripulante mós akontese duni no lamentavél, alende Governu sai na’in bá Ró referé, hakarak aproveita mós hodi  fó fomrasaun bá tripulante Timoroan sira mais sé akontese tripulante sira Timoroan troka husi tripulante Indonézia ne’e sei envia bá MTK atu bele espliká tanbasá mak akontese problema ida-ne’e.

Jornalista Estajiária : Zita Menezes