Hatutan.com, (13 Marsu 2025), Díli- Primeiru-Ministru (PM), Kay Rala Xanana Gusmão hateten iha enkontru semanál ho Prezidente Repúblika (PR), José Ramos-Horta, Kinta (13/03/2025), informa liu kona-bá preparasaun governu nian, liu-liu ministériu relevante sira hodi simu bainaka sira ba atividade G7+ nian no atividade Luzofonia nian liga ho jogu CPLP ne’ebé sei realiza tinan ne’e iha Timor-Leste.

Lee Mós: Ramos-Horta Ko’alia Problema Mundiál no Pás iha Semináriu Internasionál g7+

PM Kay Rala Xanana Gusmão. Foto/Elio dos Santos da Costa

“Enkontru ho Prezidente Repúblika ne’e kada semana ne’ebé ami la ko’alia buat barak, informa de’it ba Prezidente Repúblika katak iha preparasaun daudauk ona husi ministériu hotu atu simu bainaka sira ne’ebé sei mai. La’ós de’it ba atividade hanesan G7+ , atividade Luzofonia ninian, atividade jogu CPLP ho tan Primeiru Ministru Malázia, Primeiru Ministru Vietname ne’ebé mós sei vizita Timor-Leste,” Primeiru-Ministru Kay Rala Xanana Gusmão ba jornalista sira iha Palásiu Prezidensiál.

Xefe Governu hatutan informa ba Prezidente Repúblika, iha Parlamentu Nasionál diskute hela lei ba orsamentu hodi troka tiha ho lei ida governu anteriór uza ba jestaun ba osan husi fundu petroleum no buat sira ne’e hotu.

Informa mós ba Prezidente Repúblika, Diretór Jerál ida husi Ministériu Negósiu Estranjeiru España nian mai husi Madríd, hodi fó hanoin katak sira mós hakarak partisipa iha prosesu projetu tasi-mane, ne’ebé órgaun estadu hasoru malu ho Ministru Petróleu ninian.

“Ha’u informa mós ba Prezidente Repúblika katak governu foin daudauk ne’e aprova tiha ona katak autoriza Ministru Petróleu nian atu loke konkursu ba Suai Suplay Base, ho rota tolu ba iha estrada husi Suai ninian ba Betano, ho Natabora,” Xanana Gusmão esplika.

Nia subliña iha enkontru ne’e ko’alia mós uitoan kona-ba situasaun polítika agora iha Portugál. Ko’alia uitoan kona-ba funu iha Ukránia ne’ebé situasaun mak ida ne’e.

Governu Informa Mós Planeamentu Urbana Ba Prezidente Repúblika

Primeiru-Ministru Kay Rala Xanana Gusmão fó hatene mós ba Prezidente Repúblika katak governu hakarak planeamentu urbanu ne’ebé di’ak, la’e kapital sai hanesan fali aldeia ida.

“Ema barak sei protesta oi-oin atu hahú daudauk ona, atu halo estrada Kuluhun nian, husi parte liman karuk nian ne’ebé karreta sira liu nafatin ho mós parte liman karuk ponte tanba ponte mós kiik demais ona. Depois bainhira parte liman karuk ne’e hotu tiha, halo fali parte liman loos ho fali ponte ne’ebé ita hahú uluk ida ne’e,” Xanana Gusmão hateten.

Xefe Governu subliña sei la ko’alia kona-bá Becora, iha Becora mak hotu-hotu reklama funu na’in buat sira ne’e hotu, mas funu atu dezenvolve rai, la’ós funu atu dezenvolve an.

“Atan oan ha’u hanoin katak la udan ona mas foin daudauk Sábadu udan. Família afetada iha Ponte Comoro nia sorin ba, ha’u ba iha ne’ebá la’o iha taho-laran, ha’u la haree hetan imi la mosu liu,” Xanana tenik.

Jornalista: Elio dos Santos