Hatutan.com, (24 Marsu 2025), Díli- Papa Francisco nia saúde rekupera ona hafoin semana lima ka loron 38 nia laran hala’o tratamentu intensivu iha ospitál Gemelli no daudaun ne’e Papa Francisco mós fila hikas ona ba Casa Santa Marta iha Vatikanu.

Lee Mós: Mensajen Papa Francisco Ba Kuarezma 2025: “Mai Ita La’o Hamutuk iha Esperansa”

Papa Francisco nia saúde rekupera ona. Foto/Espesiál

Sita husi Vatikanu News, Segunda (24/03/2025) relata katak  Domingu (23/03/2025), Papa Francisco sai husi nia fatin tratamentu iha ospitál Gemelli, iha andar ba dalimak nian (pizu 5)  hodi hasé sarani Romanu sira no turista sira ne’ebé kada loron sempre ba iha resintu ospitál Gemelli nian hodi vizita ka haree no hatene kona-ba Papa Francisco nia saúde.

“Obrigadu ba imi hotu!”, ida-ne’e mak liafuan dahuluk sai husi Papa Francisco nia ibun hodi hasé sarani fiar na’in hotu no turista sira iha resintu ospitál Gemelli.

Iha ema lubun boot nia leet, Papa Francisco koñese señora ida, Carmela, ne’ebé kada loron-kuarta partisipa iha Audiénsia Jerál hodi fó ba nia ai-funan lubun ida: “No ha’u haree señora ida-ne’e ho ai-funan mean sira. Nia ema di’ak ida,” Papa hateten hosi andár 5.º Ospitál Gemelli nian.

Papa Francisco iha ona Casa Santa Marta

Durante anúnsiu hosi Papa Francisco nia rekuperasaun ba nia saúde  (alta), ne’ebé halo iha loron-sábadu (22/05/2025), médiku sira Sergio Alfieri ho Luigi Carbone alerta katak Papa isin-tun uitoan, maibé Papa Francisco ho kondisaun saudavel hodi kumprimenta sarani sira ho oin ne’ebé ksolok, hodi foti liman sinál “joia”, no Papa fó bensan ho nia liman.

Iha prasa ospitál nian, ema atus resin maka asiste momentu ida-ne’e ne’ebé hein kleur ona. Husi Fortaleza – CE, Denise lori afetu no domin brazileiru sira nian ba Santu Padre. Nune’e mós,  Carmela, ne’ebé Amu Papa koñese iha ema-lubun nia leet, ho nia ai-funan mean, hatudu ksolok no agradesimentu ba Papa Francisco nia alta iha ospitál.

Lakleur de’it, Amu Papa sai hosi ospitál hodi bá Casa Santa Marta. Durante viajen, nia para iha Bazílika Santa Maria Maggiore nian hodi entrega ai-funan lubun ida ne’ebé hanesan nia simu nu’udar prezente hosi Señora Carmela ba kardeál Rolandas Makrickas, arse-saserdote koadjutor, ne’ebé tau iha íkonu Salus Populi Romani nia oin hodi agradese ba nia rekuperasaun.

Hafoin, Papa Francisco fila fali ba Vatikanu no, molok tama iha portaun besik nia rezidénsia, nia halo parajen ida ikus hodi kumprimenta militár sira ne’ebé hein fatin ne’ebá.

Husi suplikasaun ba gratidaun

Arse-Saserdote Kardeál Bazílika Vatikanu nian, Dom Mauro Gambetti, introdús, iha kalan domingu ne’e, 23 Marsu, iha Prasa S. Pedro, iha reza rozáriu ba Amu-Papa, ne’ebé alta ohin dadeer hosi Ospitál Gemelli, liutiha fulan ida resin.

Arse-Saserdote Kardeál Bazílika Vatikanu ne’e hateten Ksolok boot ida, Amu-Papa fila ona mai uma no hotu-hotu hakarak agradese ba Maromak, hamutuk ho Maria!”.

Enkontru orasaun ne’e sempre hafoun ka halo bebeik kada  kalan dezde 24 Fevereiru, hodi husu grasa rekuperasaun Pontífise nian. Ohin kalan, elojia ba Amu-Papa nia fila ba uma.

“Maun-alin doben sira, ita halibur iha-ne’e dala ida tan iha orasaun, unidu iha fuan no espíritu husi ita-nia doben Santu Padre, Papa Francisco, ne’ebé Kreda hein ho konfiansa boot durante períodu moras nian ne’e. Husu katak nia fila ba uma, iha ne’e iha Vatikanu, iha Kreda nia fuan, sai sinál esperansa nian ba sira hotu ne’ebé, iha momentu ida-ne’e, hasoru ho laran-metin no ho konfiansa terus terus nian.” Hateten Arse-Saserdote Kardeál Bazílika Vatikanu nian, Dom Mauro Gambetti.

Ita-nia orasaun, ne’ebé akompaña nia iha fulan apreensaun ida-ne’e, kontinua no sai súplika ida ba Na’i, atu nia bele haraik bensaun ba nia ho rekuperasaun lalais no kompletu, fó fali forsa no saúde ba nia atu kontinua gia Maromak nia povu ho domin, matenek no vigor.

Hafoin, kardeál Gambetti konvida sarani sira no membru sira Kúria Romana nian atu medita hamutuk kona-ba Mistériu sira Santu Rozáriu nian, “hodi invoka intersesaun Maria nian, Inan Kreda nian, atu nia kontinua apoia ita-nia Amu-Papa ho ninia protesaun materna”.

Iha orasaun nia rohan, Dom Mauro agradese ba ema hotu nia prezensa iha Prasa Saun Pedro nian iha loron hirak ne’e no ba sira nia fidelidade hodi reza ba Santu Padre, no konvida ema hotu atu kontinua, iha ida-idak nia uma no parókia, reza ba Amu-Papa no agradese ba nia rekuperasaun.

Jornalista: Elio dos Santos/Vatikanu News