Hatutan.com, (01 Abríl 2025), Díli– Membru Parlamentu Nasionál (PN) husi Bankada KHUNTO, Irene Gonzaga Sarmento, Tersa (01/04/2025), levanta iha plenária kona-bá ai-moruk vasina ba bebé sira kuaze fulan-tolu ba haat laiha.

Lee Mós: Setór Saúde Problema Tanba Inkapasidade Governasaun Xanana iha Planeamentu no Jestaun

Foto/Dok.Promosaun Edukasaun Saúde

“Ha’u rasik to’o iha fatin vasina nian  lori ha’u nian oan atu bá vasina fulan-sia nian, maibé parteira sira hateten katak agora daudaun ai-moruk vasina laiha kuazé fulan-tolu ka haat ona,” Deputada Irene Gonzaga hateten iha nianintevensaun.

Nia husu Minstériu Saúde atu buka hatene no rezolve situasaun  ida-ne’e urjentemente tanba labarik sira moris mai tenke vasina para hetan saúde di’ak no  labele hetan  moras kinur.

Iha fatin hanesan membru  Bankada FRETILIN, Lidia Norberta sekunada tán katák ai-moruk  vasina ba oan sira ne’e mós kontinua la iha  tanba inan-aman sira lori oan bá vasina no resposta husi pesoál saúde sempre hanesan.

Nia husu komisaun F-PN ne’ebé trata asuntu Saúde atu bá halo fisklaizasaun iha Munisípiu Liquiça atu bele haree situasaun sira ne’e

Deputada Lidia Norberta hatutan tán katák areá saúde iha Munisípiu Liquiça iha postu saúde Lauhata, komunidade sira komunika nia parte bá haree situasaun iha  ne’ebá no ko’alia ho komunidade sira katák ai-moruk parasetamol ho amoxilin mós laiha atu atende bá pasiénte sira.

Sita husi pájina Promosaun Edukasaun Saúde, katak vasina labarik sira – liu-liu hahú husi bebé foin moris to’o tinan-rua (2), depois kontinua ho vasina ba tinan-haat (4) no tinan-neen (6)  iha tempu ne’ebé loos, mak maneira di’ak liu hodi bele proteje sira husi moras sarampu, rubela, polio, pertussis, pneumococcal, no moras infesiozu sira seluk.

Hatán bá kestaun ne’e, Vise-Ministru Asuntu Parlamentár Adérito Hugo da Costa hateten katák, iha fatin balu mak ai-moruk vasina laiha, la’ós fatin hotu-hotu ne’ebé husu Deputada sira labele jeneraliza sasan.

Jornalista Estajiária: Zita Menezes