Hatutan.com, (03 Abríl 2025), Díli– Xefe Gabinete Guarda Nasionál, Ministériu Defeza Estadus Unidus Amérika (EUA), Jenerál Steven S. Nordhaus hasoru-malu ho Primeiru-Ministru (PM), Kay Rala Xanana Gusmão hodi k’oalia no hametin  parseria entre EUA ho Timor-Leste (TL).

Lee Mós : Jenerál Steven S. Nordhaus husi Estadus Unidus Amérika Vizita Timor-Leste Hodi Hametin Kooperasaun Militár

Xefe Gabinete Guarda Nasionál, Ministériu Defeza Estadus Unidus Amérika (EUA), Jenerál Steven S. Nordhaus hasoru-malu ho Primeiru-Ministru (PM), Kay Rala Xanana Gusmão iha Pálasiu Governu, Kinta (03/04/2025). Foto/Elio dos Santos da Costa

“Agradese bá oportunidade mai vizita  Timor-Leste. Ida-ne’e mak ha’u-nia vizita dahuluk no ohin ha’u iha oportunidade di’ak atu hasoru-malu ho Primeiru-Ministru Xanana Gusmão. Ami iha diskusaun di’ak kona-bá ita-nia valór no parseria sira ne’ebé ita fahe. Parte ida hosi Guarda Nasionál mak programa parseria Estadu nian,” Jenerál Steven S. Nordhaus hateten bá jornalista sira hafoin hasoru malu ho Primeiru Ministru Kay Rala Xanana Gusmão Palásiu Governu, Díli Kinta (03/04/2025).

Vizita Jenerál Nordhaus subliña importánsia hosi kolaborasaun kontínua entre Estadus Unidus Amérika no Timor-Leste iha seitór defeza no vizaun hamutuk bá futuru ida ne’ebé seguru no prósperu.

Durante vizita, Jenerál Nordhaus halo ona diskusaun altu nível hirak ho Prezidente José Ramos-Horta, Ministru Defeza Donaciano do Rosário Gomes, no Vise Xefe Estadu Maiór Jenerál Majór Jenerál Calisto dos Santos Coliati.

Enkontru hirak  ne’e hala’o iha ámbitu Programa Parseria Estadu nian, subliña Estadus Unidus Amérika nia kompromisu bá tempu naruk hodi reforsa lasus seguransa ho Timor-Leste.

Diskusaun hirak ne’e foku bá hakle’an kooperasaun militár bilaterál, hasa’e kapasidade defeza nian, no fasilita interkámbiu perísia estratéjiku sira hodi apoia estabilidade no seguransa rejionál iha Indo-Pasífiku.

Jenerál Nordhaus mós sei partisipa iha serimónia ofisiál entrega Hangar Aviaun nian no Armajen Asisténsia Umanitária no Auxíliu Dezastre (HADR) ba Komponente Aérea F-FDTL iha Baucau iha loron 4 Abríl.

Serimónia ne’e marka momentu importante ida iha parseria defeza Estadus Unidus-Timor-Leste, no fasilidade foun hirak ne’e sei hasa’e F-FDTL nia kapasidade resposta ba dezastre no prontidaun operasionál, hodi reforsa Timor-Leste nia reziliénsia no seguransa.

Vizita altu nível ne’e reafirma parseria ne’ebé forte no buras entre Estadus Unidus Amérika no Timor-Leste, nune’e reflete kompromisu hamutuk ida bá kooperasaun defeza, estabilidade rejionál, no kolaborasaun ba tempu naruk.

Jenerál Steven S. Nordhaus nu’udár Xefe da-30 Gabinete Guarda Nasionál nian no nu’udár membru ida hosi Xefe Estadu-Maiór Konjuntu.

Iha kapasidade ida-ne’e, nia serbí hanesan asesór militár bá Prezidente Estadus Unidus Amérika, Ministru Defeza, Konsellu Seguransa Nasionál no hanesan kanál komunikasaun ofisiál Ministériu Defeza nian ba Governadór sira no Adjuntu Jenerál Estadu sira kona-ba asuntus hotu-hotu relasiona ho Guarda Nasionál.

Nia mak responsável atu asegura katak membrus 430.000 resin hosi Ezérsitu no Forsa Aérea Guarda Nasionál nian iha duni kapasidade no prontu atu proteje nasaun no fornese bá Ezérsitu no Forsa Aérea rekursu hirak-ne’ebé prontu hodi uza bá kombate.

Jenerál Nordhaus graduadu hosi Akademia Forsa Aérea Estadus Unidus Amérika nian iha tinan 1989 ho Lisensiatura iha Siénsia Enjeñaria.

Nia lori ona aviaun funu iha misaun kombate nian iha operasoens Southern Watch, Vigilant Warrior, Northern Watch, Iraqi Freedom no Enduring Freedom.

Molok sai Xefe Guarda Nasionál iha loron 2 Outubru 2024, Jenerál Nordhaus antes ne’e hala’o kna’ar nu’udár Komandante Rejiaun Komandu Defeza Aeroespasiál Kontinentál Amérika Norte hosi Estadus Unidus Amérika nian; Komandante, 1a Forsa Aérea (EUA nia Forsa Aérea Norte no EUA nia Forsa Aérea Espasiál), iha Baze Forsa Aérea Tyndall, Florida.Commander, Continental U.S. North American Aerospace Defense Command Region; Commander, 1st Air Force (U.S. Air Forces Northern and U.S. Air Forces Space), Tyndall Air Force Base, Florida.

Jornalista: Elio dos Santos da Costa