Hatutan.com, (23 Abríl 2025), Díli- Ministru Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru” hateten, dadus reklamasaun no kontestasaun iha segundu faze ne’ebé MACLN rejistu   liu 42,000.

Lee Mós: PPN Husu Komisaun Independente MACLN-CCLN Halo Fiskalizasaun ba Lista Veteranu Rejistu 2009

Ministru Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru” . Foto/Zita Menezes

“Dadus reklamasaun no kontestasaun iha segundu faze ne’e liu 42.000, maibé seidauk mai hotu tanba sira iha  Konsellu Kombatente Libertasaun Nasionál (CCLN) munisipiu sira kontestasaun reklamasaun natoon ami halo estensaun bá loron 17 fulan-Abríl ne’e hotu tiha ona, maibé loron ne’e hotu  iha loron páskua entaun CCLN Munisípiu sira seidauk bele lori dokumentu sira ne’e mai hotu,” Ministru Gil da Costa Monteiro “Oan Soru” bá Jornalista sira hafoin remata konsellu Ministru  iha Palásiu Governu, Kuarta (23/04/2025).

Membru Governu ne’e hateten loron páskua liu ona nune’e CCLN munisípiu sira prepara ona atu lori hotu dokumentu mai mak MACLN bele anúnsiu públiku katák lista ne’e hira loloos mak válidu, tanba dadus reklamasaun segundu faze ne’e foin munisípiu Viqueque ho Lautem mak entrega ona restu seidauk.

Faze tuir mai mak reklamasaun kontestasaun mai hotu husi munisípiu sira halo avaliasaun ida ne’ebé mak tuir rekizitu ne’e pagamentu la’o, maibé pagamentu ne’e la’ós atu la’o iha fulan hirak mai ne’e lae, nia sei bele to’o iha terseiru trimestre.

Ministru Gil Oan Soru haktuir reklamasaun ne’e barak liu ne’e ema hakarak bá grau 8/14 hotu, husu hakarak bá de’it dalaruma lei hatete buat seluk ema hatete buat seluk ne’ebé prontu husik dokumentu ne’e tama hotu mai haree hotu mak foin anúnsiu bá públiku.

“Orsamentu bá pagamentu  prevee ona iha tinan ida-ne’e nian, agora kestaun mak dokumentu sira ne’e mai hotu para ita haree, tanba reklamasaun ne’e seidauk  klaru katák hotu-hotu mai ne’e loos hotu,” Gil “Oan Soru” hateten.

Jornalista Estajiária: Zita Menezes