Hatutan.com, (07 Maiu 2025), Díli- Prezidente Senadu Reinu Kambodia, Samdech Akka Moha Sena Padei Techo Hun Sen, ho delegasaun hamutuk ema na’in-43 hala’o vizita ofisiál mai Timor-Leste durante loron-tolu hodi diskute no hakle’an kooperasaun bilaterál entre país rua iha área ekonómiku, edukasaun no turizmu.

Lee Mós: Kambódia Admira no Apoia Totalmente Adezaun TL ba ASEAN

Prezidente Senadu Reinu Kambodia, Samdech Akka Moha Sena Padei Techo Hun Sen to’o iha Timor-Leste, Kuarta (07/05/2025). Foto/Elio dos Santos da Costa

Membru delegasaun ne’ebé akompaña Prezidente Senadu Reinu Kambodia, Samdech Akka Moha Sena Padei Techo Hun Sen ne’e inklui mós Vise-Prezidente Senadu Kambodia OuCH Borith, Prezidente Komisaun Negósiu Estranjeiru Kooperasaun Internasional no Informasaun Senadu Kambodia CHEM Widhya, Prezidente Komisaun Negósiu Estranjeiru, Kooperasaun Internasional no Informasaun Asembleia Nasional SOUS Yara, Ministru Senior enkaregadu ba Enkargu ba Misaun Espesiál SRY Thamarong, Sekretáriu Jerál Senadu Kambodia LAY Samkol, Xefe Gabinete Prezidente Senadu Samdech CHHIV Yiseang,  Sekretariu Estadu Komérsiu PICH Rithi, Deputadu no Asisténsia ba S.E. OTSMAN Hassan ROFY Othsman, Sekretaria Estadu, Gabinete Konsellu Ministru (KOM) KET Sofan, Sekretaria Estadu (KOM), no Protokolu ba Prezidente Senadu Samdech  PURY Sokha, Sekretariu Estadu tutela ba Ministeriu Finansas no Ekonomia SIM Vireak, inklui delegasaun sira seluk husi Ministériu Negósiu Estranjeiru Reinu Kambodia no média sira Reinu Kambodia nian.

Prezidente Senadu Reinu Kambodia, Samdech Akka Moha Sena Padei Techo Hun Sen to’o iha Aeroportu Internasionál Prezidente Nicolau dos Reis Lobato, Kuarta (07/05/2025) ho Aviaun Reinu Kambodia  nian iha oras tuku 17:40 Otl no simu direita husi Prezidente Repúblika, José Ramos Horta, Primeiru-Ministru Kay Rala Xanana Gusmão, Vise Primeiru-Ministru, Francisco Kalbuadi Lay, Ministru Negósiu Estranjeiru no Kooperasaun, Bendito Freitas, Vise Ministra Asuntu Asean, Milena Rangel, inklui Ministru sira balun.

Durante vizita iha Timor-Leste Prezidente Senadu no eis Primeiru-Ministru Reinu Kambodia  sei iha enkontru ho Prezidente Parlamentu Nasionál Timor-Leste Maria Fernanda Lay no sei iha mós sesaun solene iha ne’ebé Senadu Reinu Kambodia sei hato’o mós nia diskursu liga ho polítika relasaun bilaterál país rua nian, kontinua ba sorumutuk ho Primeiru-Ministru Kay Rala Xanana Gusmão no membru governu sira iha Palásiu Governu no kontinua mós iha enkontru bilateral ho Prezidente Repúblika José Ramos-Horta iha Palásiu Prezidensiál.

Prezidente Senadu Reinu Kambodia, Samdech Akka Moha Sena Padei Techo Hun Sen, sei hato’o mós nia palestra ofisial iha Palásiu Prezidensiál iha sesaun solene estraordináriu ho títulu “Jenosídiu no kiak to’o liberdade no prosperidade”.

Tuir ajenda iha loron 08 fulan-Maiu ne’e, Senadu Reinu Kambodia Hun Sen sei vizita mós Portu Baia Tibar no sei akompaña husi Ministériu relevante no parte loro-kraik sei iha bangkete ne’ebé oferese husi Prezidente Repúblika José Ramos-Horta iha Palásiu Nobre Lahane.

Estadu Timor-Leste sei kondekora Samdech Techo Hun Sen ho Grande Colar Órdem Timor-Leste nian, nu’udár rekoñesimentu bá nia kontribuisaun signifikativa sira hodi apoia Timor-Leste iha dékada rua ikus, partikularmente iha nia perkursu adezaun TL bá Association of Southeast Asian Nations (ASEAN).

Husi Aeroportu Internasionál Prezidente Nicolau dos Reis Lobato ba  Palms Spring Hotel Fatuhada Prezidente Senadu Reinu Kambodia, Samdech Akka Moha Sena Padei Techo Hun Sen tula direita husi Prezidente Repúblika José Ramos-Horta ho MOKE no akompaña direita husi Primeiru-Ministru Kay Rala Xanana Gusmão.

Vizita Prezidente Senadu Kambodia, Hun Sen mai Repúblika Demokrátika Timor-Leste refleta kompromisu forte hosi Kambodia ho avansu diplomasia parlamentár, fortalese liu-tán relasaun bilaterál hodi kontribui bá páz, seguransa, estabilidade no prosperidade iha rejiaun no mós mundu.

Estudante sira husi eskola Primeira Síkulu too Terseira Síkulu husi eskola oioin forma iha dalan hodi simu Senadu husi Reinu Kombodia, Hun Sen, ho nia delegasaun hamutuk-41.

Tuir observasaun husi Hatutan.com iha terrenu haree katak Estudante sira ho kontente hakilar viva hodi simu Prezidente Senadu Reinu Kambodia, Samdech Akka Moha Sena Padei Techo Hun Sen.

Estudante sira ne’e mai husi eskola Maria Auxiliadora Komoro, Eskola Kristal, eskola Kanossa no Colégio São Migue, Eskola An-nurl inklui seluk tan ne’ebé hamriik iha dalan ninin hahú husi aredór Aeroportu too iha Rotunda Prezidente Nicolau Lobato Komoro. Nune’e kada estudante ida kaer Bandeira Timor-Leste inklui Bandeira husi Nasaun Kambodia nian no akompaña husi drum band husi Eskola Kanossa no Eskola Kristal inklui dansa Tradisionál husi Weliku-Welahi inklui mós sira seluk.

Kondekora Ho Medalla Grande Colar

Estadu Timor-Leste sei kondekora Prezidente Senadu Reinu Kambodia, Samdech Techo Hun Sen ho Grande Colar Órdem Timor-Leste nian, nu’udár rekoñesimentu bá nia kontribuisaun signifikativa sira hodi apoia Timor-Leste iha dékada rua ikus, partikularmente iha nia perkursu adezaun TL bá ASEAN.

Vizita Prezidente Senadu Kambodia, Hun Sen bá Repúblika Demokrátika Timor-Leste refleta kompromisu forte hosi Kambodia ho avansu diplomasia parlamentár, fortalese liu-tán relasaun bilaterál hodi kontribui bá páz, seguransa, estabilidade no prosperidade iha rejiaun no mós mundu.

Samdech Techo Hun Sen sei partisipa iha sesaun estraordinária iha Parlamentu Nasionál Timor-Leste ne’ebé sei hato’o palestra ho títulu “Lisaun sira hosi Hun Sen: Hosi Genosídiu no Pobreza bá to’o Liberdade no Prosperidade” iha Palásiu Prezidensiál.

Eventu ida-ne’e sei partisipa hosi membru Parlamentu Nasionál, funsionáriu governamentál sira, diplomata sira, estudante sira no reprezentante sosiedade sivíl.

Jornalista: Elio dos Santos